مملکت شمال ده‌گی امنیتی مسوللردیدی طالبان گروهی بلخ ولایتی بلخ تومنی « فلاس پوش» منطقه سیده بیرمسجد و دینی مدرسه نی هاوان بیلن نشان گه توتیب تخریب قیلگن. اما طالبان گروهی بو دینی مدرسه و مسجد امنیتی قوتلرتمانیدن بوزلگن دیب ادعا قیلگن.

  شاهین قول اردوسی مطبوعات مسولی محمد حنیف رضایی نشانه خبر آژانسی بیلن صحبت ده دیدی طالبان جنگچی لری اوتکن کونی ( جمعه ۱۲ ثور) « منهاج العلوم» مسجد و مدرسه سینی تخریب قیلگن. اونگه کوره بو دینی مدرسه و مسجد ملاامامی طالبان گروهی جنگچی لریگه رمضان آیی ده اوروش و زوروانلیک دن قول تارتیش لری کیرک بولگنی نی ایتکن دن سونگ بوگروه بو مسجد و دینی مدرسه نی نشان گه توتکن اما بو واقعه ده هیچ کیم گه صدمه یتکزیلمگن.

لیکن طالبان گروهی بو حقده خبرنامه نشر ایتیب بو دینی مدرسه و مسجد امنیتی قوتلرتمایندن آتیلگن توپ سبب تخریب بولگنی دیب ادعا قیلگن. اما ملی اردو مسوللری اوتکن جمعه کونی ده امنیتی قوتلر طالبان گروهی بیلن فلاس پوش قشلاقی ده توقنشمگنی نی اورته گه قویگن. رضایی جنابلری،طالبان بو وضعیت دن فایده لنیب امنیتی قوتلرگه قرشی تهمت تاقماده دیدی.

عینی حالده مملکت شمالی ولایتلریده طالبان گروهی نینگ هجوملری اوتمیش گه قرگنده کوپیگن و بو هجوملردن کوپراق عادی اهالی صدمه کورگن.