هرات ولايتي تنيقلي و زبردست محلي قوشيقچي و ايجادكاري استاد محمود خوشنواز اون بيش آي بيمارليك دن سونگ بوكون ايرته لب (دوشنبه ٨ثور) عالمدن اوتي.خوشنوازجنابلري عايله اعضالريني ايتيشيچه استاد خوشنواز قان باسيمي سبب سكته قيلگن.

بو هراتليك ايجاد كار قريب اون بيش آي بيمار ايدي. او هرات اهالي سي آره سيده اوته محبوب ايدي. “سرپل مالان” و ” محله سنگتراشان” ناملي قوشيق لري اونينگ مشهور ايجادلري جمله سيدن ايدي.بو محلي ايجادكار كتته فرزندي معروف خوشنواز ديدي آته سي ٤٠ ييل هنري فعاليت دن سونگ ٦٠ ياشده كسل ليك سبب خانه نشين بوليب حتي سونگي كونلرده گپلش گه قادر ايمس ايدي.

هرات ولايتي خبر و مدنيت اداره سي مدنيت و هنر بوليمي باشليغي جاويد ضرغام نشانه خبر آژانسي بيلن صحبت ده ديدي:” استاد خوشنواز هرات محلي و فولكولور موسيقي سي نينگ ارزگوليك غنيمتلري جمله سيدن ايدي.” ضرغام جنابلري، بو زبردست ايجادكارنينگ عالم دن اوتكني هرات محلي موسيقي سي اوچون تولب بولمس بير ضايعه دير ديدي.

اشوله چي، شاعر و محلي قوشيقچي استاد محمود خوشنواز بو ولايت موسيقي سي نينگ اصلي ستون لريدن بيري ايدي. او قرغ ييل ليك هنري فعاليتي دورانيده، هرات لهجه سيده محلي قوشيق لر ايجاد ايتيشي بيلن اوزيدن ييريك ميراثلر قالديردي. استاد خوشنواز شونينگ ديك كوپلب شاگردلرهم تربيه لشكن.