مسجدلر ايچكري سيده ايككي قانلي پارتلش و نيچه ملاامام ، دين عالم لري و بيرقطار مقتدي لر اولديريلگن دن سونگ، جمهورريس غني مملكت امنيتي ارگانلريگه دين عالم لري خوفسيزليگي ني تامين لشده جدي چاره تدبير كوريشلري اوجون بويروغ صادر ايتكن.

جمهورريس سوزچيسي صديق صديقي تويترصحيفه سيده يازگن غني جنابلري كابينه ني بوكون گي ( دوشنبه ٢٦ جوزا)يغينيده شيرشاه سوري مسجدي ده يوزبيرگن پارتلش ني قاره لب، امنيتي ارگانلر گه دين عالم لري و مملكت مذهبي شخصيتلري خوفسيزليگي ني تامينلش ده جدي چاره تدبير كوريش ده بويروغ صادر ايتكن.

صديقي جنابلريگه كوره، جمهورريس تاكيدلشكن:” دين عالم لري، مملكت اهالي سي نينگ خوفسيزليگي ني تامينلش يانيده امنيتي قوتلرنينگ دستلب كي مسوليتي دير.”

آخركي كونلرده مسجدلرده پارتلش واقعه لري كوپيگن . بو پارتلش لر بير قطار دين عالملري تشويشي گه سبب بولگن. اينگ سونگي واقعه اوتكن هفته شيرشاه سوري جامع مسجديگه يوز بيرگن پارتلش ايدي. بو پارتلش نتيجه سيده مسجد ملا امامي داخل تورت كيشي قربان بوليب و سكيز كيشي ياره لندي.

شونگه اوخشه گن ينه بير واقعه ده نيچه وقت آلدين كابل شهري نينگ وزير اكبرخان مسجدي گه هم پارتلش يوز بيريب اوني نتيجه سيده بو جامع مسجد خطيبي و مملكت تنيقلي دين عالم مولوي اياز نيازي اولديريلدي. بو پارتلش ده ينه بيركيشي قربان بوليب نيچه كيشي جراحتلنگندي. هرچند امنيتي ارگانلر بو پارتلش لرده طالبان دخلدار بولگني ني ايتكن اما طالبان گروهي بو پارتلش لرده قولي بارليگي ني رد ايتكن.