قندهار ولايتي محلي رسميلري بو ولايت ده پوليس نينگ بير پوسته سي يقنيده بمب جايلشتيريلگن موتر  پارتلگني اينگ آز تورت كيشي دن جان اليب و ٣٠ كيشي ني ياره لنتيرگني ني تصديق لشكن.

قندهار پوليسي سوزچيسي جمال ناصر، بو واقعه اوتكن اقشام ( يكشنبه ١٨ عقرب) ميوند تومنيده يوزبيرگني ني ايتكن. ناصر جنابلري بو هجوم ميوند تومني شاه يوللردن محافظت قيلوچي پوليس قوتلري مركزيني نشان گه آلگن ديدي. اونگه كوره بو موتر بمب پارتلشي سبب تورت كيشي اولديريليب و ٣٠ كيشي هم ياره لنگن.

قندهار پوليسي سوزچيسي ياره لنگن لردن اينگ اون كيشي سي عادي اهالي بولگن ديدي.

عيني حالده قندهار عامه ساغليك اداره سي مسووللري بير خبرنامه نشر ايتيب بو واقعه ده ياره لنگن لر برچه سي ميرويس شفاخانه سيده دوالنيشي اوچون انتقال بيريلگن ديگن. بو اداره ياره لنگن لردن بعضي لري ساغليك وضعيتي بمان بولگني ني ايتكن.

حاضرگه قدر هيچ بير شخص يا گروه بو واقعه مسوليتي اوز بوينيگه آلمگن. طالبان هم بو باره ده بيران نرسه ايتمگن.

سونگي كونلرده قندهار ولايتي نينگ بير فطار تومنلري امنيتي قوتلر و طالبان جنگچي لري ارا توقنشولرگه گواه بولگن. ملي مدافعه وزيرليگي معلوماتيگه كوره بو توقنشولرده طالبان جنگچي لريدن ٤٠٠ كيشي اولديريلگني ني ايتكن.