كابل پوليس قوماندانليگي، بو شهرنينگ تورتينچي و اوبيرينچي امنيتي حوزه لريده ايككي پارتلش يوز بيرگني ني تصديقلشكن.

كابل پوليس سوزچيسي فردوس فرامرزگه كوره بيرينچي واقعه بوكون ( شنبه ٨ قوس) ايرته لب ساعت ٠٧:٣٥ ده آلتينچي امنيتي حوزه گه تيگيشلي “اميد سبز” شهرچه سي يوليده و عدليه وزيرليگي ينگي بناسي يقينيده يوزبيرگن ديب ايتي. فرامرز جنابلريني معلوم قيليشيچه بير فورد نقليه واسطه ده مقناطيسي ماين جايلشتيريلگن ايكن. اونگه كوره بو پارتلش ده بو واسطه نينگ اوچ يولوچي سي ياره لنگن. هر چند ياره لنگن لر كيم ليگي معلوم بولمگن اما ايتيليشيچه ياره لنگن لر پارلمان نينگ بير نماينده سي عايله اعضاسي بولگن.

كابل پوليسي سوزچيسي عيني دمده ايككينچي پارتلش “خيرخانه” منطقه سيني ايككينجي حصه سيده و مقناطيسي ماين پارتلشي سبب يوزبيرگني دن خبر بيرگن. بو واقعه ده اينگ آز تورت كيشي ياره لنگن.

بو واقعه ساعت ٠٧:١٠ ده سينما گولايي سي حدوديده و بير لندكروزر واسطه ده اورنتيلگن مقناطيسي ماين پارتلشي سبب يوزبيرگن. بو پارتلش ده ياره لنگن تورت كيشي امتيتي ملازم لر بولگني ايتيلگن.

حاضرگه قدر بو ايككي واقعه مسوليتي ني هيچ كيم يا گروه اوز ضممه سيگه آلمگن اما مملكت امنيتي قوتلري بونداي هجوملرده عموما طالبان دخلدار ديب تاكيدلشكن.