پاكستان ني افغانستان ايشلري بويچه مخصوص نماينده سي، جمهور رييس محمد اشرف غني نينگ پاكستانليك محبوسلرني قويب يوباريش ده صادر ايتكن فرماني كابل و اسلام آباد ارا انسان پرورليك علاقه لرني رواجلنتيره آليشي ني تاكيدلشكن.

پاكستان باش وزيريني افغانستان بويچه مخصوص نماينده سي محمد صادق خان بوكون ( سه شنبه ٤ قوس) توييتر آرقلي نشر ايتكن پياميده، افغانستان دولتي قماقخانه لريدن بيرقطار پاكستانليك محبوس لر قويب يوباريليشي ني آلقيشلگن.

بوندن آلدين جمهور رييس غني اوتكن كوني توش دن سونگ كابل اسلام آباد ارا علاقه لرني مستحكم لنيشي اوچون دولت قماقخانه لريدن بير قطار پاكستان ليك محبوسلر قويب يوباريليشي فرماني ني امضاقيلگن. عيني حالده صادق خان جنابلري بو محبوسلرني قويب يوباريليشي فرماني ني صادر ايتيليشي ايككي مملكت ارا انسان پرورليك علاقه لرني رواجلنيشي ده مثبي تاثير يتكزيشي ني ايتكن.

افغانستان دولتي قماقخانه لريده سقلنه ياتكان پاكستان ليك محبوسلرني قويب يوباريليشي فرماني، اوتكن هفته پاكستان باش وزبري عمران خان ني كابل گه قيلگن سفري آرتيدن و جمهور رييس غني بيلن به تفصيل سوزلشكني دن سونگ صادر ايتيلگن. بو سفر جريانيده كابل و اسلام آباد ايككي مملكت ارا نيچه قره لي علاقه لرني رواجلنتيريش و قوللب قوتلوچي بير حجت ني امضالشديلر.

اما بير قطار سياسي سيما و شخصيتلر ايككي مملكت ارا علاقه لرني قوللب قوتلش بهانه سيده پاكستان ليك محبوسلرني قويب يوباريليشي ده قرشيليك كورستكنلر. مملكت سابق ملي امنيت ريسي رحمت الله نبيل، جمهور رييس غني پاكستان نينگ بير قطار خطرلي محبوس لري جمله دن داعش گروهي ني خراسان قناتي رهبري ني پاكستان استخبارات تشكيلاتي( آي . اس . آي) گه پاره عنواني بيلن تقديم ايتكني ني ادعا قيلگن. اوني تاكيدلشيشيچه جمهور ريس غني قدرت گه قاليش اوچون بو حركت ني قيلگن.