اردۉغان: تورکيه کابل هواقونالغی خوفسیزلیگینی تأمینلش وظیفهسینی اۉز ذمّهسیگه آلهدی
تورکيه جمهوررییسی رجب طیب اردۉغان، اونینگ مملکتی کابل هواقونالغی خوفسیزلیگینی تأمینلش اوچون مسوولدیر دیب ایتکن.
تورکيه نینگ اناتولی خبرآژانسی بوگون ( شنبه ۱۹ سرطان) اۉز راپوریده جناب اردوغان مطبوعات انجمنیده اوشبو مسألهنی کۉتارگنینی خبر قیلدی. خبرده ایتیلیشیچه، اردۉغان ناتو و امریکا بیلن یقینده بۉلیب اۉتگن مذاکرهلریده تورکيه نینگ افغانستانده قندهی مسوولیتلرنی اۉز ذمّهسیگه آلیشی بېلگیلب قۉییلگنینی قۉشیمچه قیلدی.
اونگه کۉره، کابل خلقارا هواقونالغی نینگ خوفسیزلیگینی تأمینلش اوچون مسوولیت افغانستاندن چېت اېل قۉشینلری چیقریلگندن ایکّی آی اۉتمهی تورکيهگه تاپشیریلهدی.
اردۉغان تورکيه کوچلری کابل هواقونالغی نینگ خوفسیزلیگینی تأمینلش اوچون قۉلیدن کېلگنیچه حرکت قیلیشیگه ایشانچبیلدیردی. خبرده ایتیلیشیچه، مجارستان و پاکستان هم کابل هواقونالغی خوفسیزلیگینی تأمینلشده تورکيه بیلن همکارلیک قیلیشی ممکن.
امریکا افغانستانده یوز بېرگن ۱۱ سپتامبر واقعهلریدن کېین دیپلوماتلرینی حمایه قیلیش اوچون یوزلب قۉشینلر افغانستانده قالیشینی اعلان قیلدی.