سابق جهادي رهبر محمد اسماعيل خان، افغانستان دولتي و طالبان گروهي ارا دوحه ده جاري صلح مذاكره لر هيچ بير يوتوق گه ايريشمگني اوچون بو مذاكره لرني آسانلشتيريش اوچون اون كيشي ليك بير هيات ايجاد ايتيليشي لازم ديب ايتكن.

ملي يرشيش عالي كينگاشي بوكون ( شنبه ٢٤ عقرب) نشر ايتكن خبرنامه سيده، بو موضوع ني اسماعيل خان هرات ده ملي يرشيش عالي كينگاشي ريسي عبدالله عبدالله بيلن اوچرشكنده بيان ايتكني ني تاكيدلشكن.

خبرنامه گه كوره اسماعيل خان، بو اون كيشي ليك هيات جهان و منطقه مملكتلري نماينده لري و افغانستان نينگ بيوك علمي و سياسي شخصيت لريدن تينچليك مذاكره لرني آسانلشتيريش اوچون ايجاد ايتيليشي ني تكليف قيلگن. بو سابق جهادي رهبر بو هيات ايجاد ايتيليشي ني جاري صلح مذاكره لرني نتيجه گه ايرشيشي اوچون اوته ضرور ديب ايتكن.

بوندن آلدين قطر مملكتي مذاكره لرني آسانلنتيروچي تمان اوله راق تنلنگندي.بو مملكت ايككي تمان ارا بيواسطه سوزلشولرگه ايجابي زمينه يرتيش ده سعي قيليشي ايتيلگندي.

اسماعيل خان عيني دمده “سياسي رهبرلر و حكومت تنقيدچيلري” ديب اته گن شخصيتلر ارا سياسي اجماع و بيردمليك شكللنيشي گه هم تاكيدلشكن. اسماعيل خان گه كوره بيرهرتمان له مه سياسي اجماع و بيردمليك وجودگه كيلمسه صلح مذاكره لر موفقيتي ناممكن دير.

او تينچليك مذاكره لر جريانيده حكومت ايشلري دن هم تنقيدلشكن.

ملي يرشيش عالي كينگاشي خبرنامه سيگه كوره اسماعيل خان جنابلري، افغانستان حكومتي صلح مذاكره لر آقيميده صداقت بيلن سعي قيلمي دي ديب ايتكن.

افغانستان دولتي و طالبان گروهي هياتلري ارا يوز مه يوز مذاكره لر بوندن ايككي آي آلدين قطر پايتختي دوحه شهريده باشلندي و ايككي تمان بو مذاكره لر ايش دستوريني يكونلتيريش بويچه بحث قيليب كيلماقده. با شقه تماندن مملكت امنيتي قوتلر و طالبان جنگچي لري ارا توقنشولر هم سونگي آي لرده شدت آلگن.