اويده ايشسيز توريش يورتي ميز ايركك لريگه يرشميدي.هراتليك ايركك لر روحي، قرنطينه و خانه نشينليك بيلن موفق ايمس. هرات يشوچيلري خصوصا” ايركك لري عموما معاشرت و كيچه اولتيريشلر اهلي ديرلر. بوكونلر قرنطينه ده كون كيچيريش بو قتلم گه قيينت كيچماقده.

هرچند مطالعه و فيلم تماشاقيليش و موسيقي تينگلش اويده گي قرنطينه خسته ليگي ني كميتيريشي ممكن اما بوخسته ليك دن قوتليش اوچون بعضي ايركك لر ينگي ايشلرني تجربه قيلگن لر. بيرقطار هراتليك ايركك لر قرنطينه فرصتي دن فايده لنيب عايله عياللري بيلن ياردم يتكزيش گه يوز كيلتيريب قرنطينه اياميني اويده خوش اوتكزماقده لر.

هرات شهريده باردي كيلدي منع ايتيلگني، دولتي و رسمي دفترلرني ياپيلگني سبب بوكونلر اجتماعي ترماقلرده ايركك لرني آشپزليك گه يوز توتكن لري قيزيق بحث لرگه ايلنگن.

بوندن آلدين اوي ايشلريده قول اورمه ياتكان و ميز آرقه سيگه اولتيريب كمپيوتر بيلن ايشلش ني عادت قيلگن ايركك لر ، ايندي ليكده ماهر آشپزلرگه ايلنگن لر.

هرات ده واسا ناملي بير نادولت اداره ريسي واسع سيدي تمانيدن آشپزليك جريانيدن آلينگن عكس فيسبوك گه قويليشي رواج تاپدي.او اجتماعي ترماقلرده اوز عكسلريني نشر ايتيش بيلن، اوز دوستلري و هرات نينگ بيرقطار تنيقلي سيمالريني بو چالش گه دعوت ايتي. سيدي جنابلري ديدي دوستلريني قرنطينه خسته ليگي دن قوتقريش اوچون اوزلري آشپزليك قيليب بوجرياندن عكس لريني فيسبوك گه نشر ايتيش لريني طلب ايتكن.

سيدي جنابلريدن سونگ هرات شهري مشهور سيمالريدن نيچه كيشي جمله دن اسحاق راوك، قشلاقلرني رواجلنتيريش وزيرليگي سوزچي سي فريدون آژند،وحيدهومان، فهيم مايار و قدير رحماني بو چالش گه قيزيقيب آشپزليك قيليش جريانيدن عكس آليب باشقه دوست لريني بو ايش گه دعوت ايتيلر.

هرات شهري مشهور هوتللريدن بيري نينگ ايگه سي قدير رحماني ديدي؛ قرنطينه برچه قيينتچليك و چيكلولري بيلن اونگه آشپزليك مهارتي ني اورگنيش اوچون يخشي فرصت مساعد ايتكن.او ديدي آشپزليك،وقت ني اوتكزيش،روحيه آليش و اويده مشغول بوليش اوچون بير فوق العاده فعاليت دير.

هرات يشوچيلريدن ينه بيري فهيم مايار بولردن كوره بير آديم آلغه قويگن.او، اوي ناني پيشيرگندن سونگ حاضر پيتزا كبي باشقه بير قطار اوقاتلرني پيشريشي ني تجربه قيلديم ديدي.

او، مين دوستلريم آره سيده اينگ يخشي آشپز من و باشقه لرگه گوشت دن پيشيريله ياتكان اوقاتلرني اورگته اله من ديدي.

عيني حالده بيرقطار هراتليك عياللر، ايركك لر آشپزليك گه يوز كيلتيرگن لريدن خرسندليك بيلديرگنلر. بو عياللرگه كوره قرنطينه و ايركك لرني بيرمدت ده اويگه قاليش لري، آشپزليك و اوي ايشي يالغيز عياللرگه خاص بولگن قره ش لريني اوزگرتيره آله دي ديديلر.بو عياللردن نيچه كيشي فيسبوك صحيفه لريده:”ايركك لر تمانيدن تورلي خيل اوقاتلرني پيشيريليشي سبب ايركك لرني آشپزليك قيينتچيليك لريدن آگاه قيليب عياللرگه نسبتا” حرمت و احتراملريني كوپيتيره اله دي” ديب يازگنلر.

قريب ايگرمه كون دن بيري هرات ده باردي كيلدي منع ايتيلگن، آذوقه ساتوچي، داروخانه لر، امنيتي و ساغليك ني سخلش اداره لردن باشقه همه ايشلر تعطيل بولگن و كسبه كارلر فعاليتي منع ايتيلگن. حاضرگه چه معلوم ايمس كه بو حالت قچان گه قدر هرات ده دوام ايته دي.

بونگه قره مسدن قرنطينه كونلريده ايركك لرني آشپزليك و اوي ايشلري بيلن بند بوليش لري بوقتلم گه يخشي حس يرتكن. روحي خسته ليك لر متخصص لريگه كوره مثبي فكرقيليش آدملرني كرونا ويروسي گه قرشي كورشده مقاوم راق سخلي آله دي. بو متخصص لر خرسندليك و اوزيني كوچلي حس قيليش، انسان بدني ايمن قاليشي ني ويروس لرگه قرشي قوللب قوتلشي ده سبب بوله دي ديديلر.