ايران دن هركوني ١٥٠٠ مهاجر فارياب گه قيتيب كيلماقده
neshananews
19 March 2020فارياب ولايتي محلي رسمي لريني ايتيشيچه ايران دن فارياب ليك مهاجرلرني قيتيب كيليشي آخركي كونلرده كوپيب بارماقده.
فارياب ولايت حاكمي سوزچي سي احمدجاويد بيدار نشانه خبر آژانسي بيلن صحبت ده ميمنه شهري غربي كمربندي ده ساغليك ني سخلش مخصوص تيملري قيتيب كيله ياتكان كيشيلر اسميني رويخط ده آليب برچه قشلاق اربابلريگه ايران دن قيتيب كيلگن كيشي لرني ايكيي هفته اويلريده قرنطين بوليش گه توصيه قليش ني خبربيرگن لر ديب ايتي.
عيني دمده نعيم مصمم فارياب عامه ساغليك اداره سي ريسي، هرات ولايتي اسلام قلعه بندري دن افغانستان گه قيتيب كيلگن مهاجرلردن اكثري فارياب آرقلي باشقه ولايت لرگه كيته ديلر و شو سبب دن اوتكن تورت كون مدتيده قيتيب كيلگن كيشي لر ساني آرتيب بارماقده ديدي.
اونگه كوره فارياب محلي اداره سي ٥٠ ياتاقي بولگن بير بناني اشبو مقصد اوچون مهيا ايتكن و افغانستان عامه ساغليك وزيرليگي بيرميليون افغاني مبلغ هم اجرتكن، بونگه علاوه فارياب مركزي كسلخانه سيده دستلب كي امكانيت و دارو موجود دير و شونينگ ديك ١٥٠ ميليون دالر هم جمهورريسليك سراي تمانيدن كرونا ويروسي گه قرشي كورش ده نظر ده آلينگن و بيز هم طبي اسباب اسكونه لرگه بولگن ضرورتلريميز رويخطي ني كابل گه جونتكن ميز ديب ايتي. عيني حالده فارياب مدني فعاللريدن بيري محمد رسول اورتاق؛ فارياب اهالي سي ايران دن قيتيب كيلگن مهاجرلر ساني كوپيب باريشي دن تشويش ده ديب و حكومت كرونا ويروسي گه شبهه لي بولگن مهاجرلرني چيگره ده اجرتيب قرنطين گه آليشي لازم دير ديب تاكيد لشدي.
شونينگ ديك فارياب مدني جماعه ترماقي ريسي سيدزيدالدين عابدي مدني فعاللر خواتيرلري حقيده ديدي: ” اهالي خواتيرلري سبب فارياب ولايتي ده كروناگه قرشي كورش كميته سي ايجاد بولگن و فارياب ولايتي شمالي ولايت لر دروازه سي اوله راق كرونا ويروسي ييريليشي دن مردم گه تشويش تاپيلگن.
او عيني دمده چيگره ني ياپيش ايچيم يول ايمس ديب اما حكومت كروناگه قرشي كورش اوچون اجرتيلگن مبلغ دن بير قسمي ني چيگره ده صرفلشي لازم دير ديدي.
نيچه كون آلدين بيرقطار مدني فعاللر و ايران دن كيله ياتگان مهاجرلر قيتيشي چيگره آچيق بولگني گه اعتراض بيلديريب كرونا ويروسي گه چلينگن كيشي لر الديني آليش اوچون چيگره ياپيليشي ني طلب ايتكنديلر.
