بادغيس ده عياللرگه قرشي زوروانليك لر كوپيگن
بادغيس ولايتي عياللر اداره سي مسووللري بو ولايت ده عياللرگه قرسي زوروانليكلر كوپيگني رويخط ده آلينگني دن خبر بيريب سونگي سيكيز آي جريانيده عياللرگه قرشي اينگ آز ٧٥ زوروانليك رويخط ده آلينگن ديب ايتيشكن.
بادغيس عياللر اداره سي ريسي راحله نادري بوكون( سه شنبه ١١ قوس) بير خبري يغين ده قولگه كيلگن رقملرلرگه اساسن اوتكن ييل گه قرگنده عياللرگه قرشي زوروانليك بو ولايت ده كوپيگن ديدي. اونگه كوره اوتكن ييلي عياللرگه قرشي كورش رقمي عقرب آيي آخريگه چه ٣٨ واقعه بوليب حالانكه جاري ييل ده بو رقم ٧٥ واقعه گه كوپيگن.
قتل، كلتكلش، جبري ايش، جبري اويلنتيريش، بدن اعضاسيني كيسيش بادغيس ده عياللرگه قرشي اينگ مهم زوروانليك لر بولگني ايتيلگن.
بادغيس ولايتي عياللر اداره سي رييسي بو ولايت ده عياللرگه قرشي كوپراق زوروانليك قضيه بالامرغاب و جوند تومنلريده يوزبيرگني ني تاكيدلشكن. خانم نادري بو ولايت ده عياللر معلوماتلري كوتاريلگني زوروانليك لر رقمي آرتكني گه تاثير قالديرگن ديدي.
عيني دمده بادغيس ولايتيدقارلوچي اداره سي عياللرگه قرشي رويخط ده آلينگ زوروانليك لر بو اداره تمانيدن ايزلنيشي دن خبربيرگن. عياللرگه قرشي زوروانليك لرني منع ايتكن قاره لوچيليك بوليمي باشليغي انجيلا حميدي جاري ييل اوليدن حاضرگه قدر بو اداره ده عياللرگه قرشي ٤٢ زوروانليك دوسيه كوريب چيقلگن ديدي.
مملكت شمالغربيده جايلشكن بادغيس عياللر فعاليتي اوجون ناتينچ ولايت دير. بو ولايت نينگ اكثر تومنلريده دولت و قانون حاكميتي ضعيف ليگي سبب عياللرگه قرشي زوروانليك عامللري اكثري قانون چنگاليگه تاپشيريلمي دي و كون اوتيشي بيلن بونداي زوروانليك لر قربانلري ساني آرتيب باره دي.