بادغیس ولایتی امنیه قوماندان لیگی مسوولریگه کوره اردو اوچاق لری نینگ هوایی هجومی و امنیتی قوتلرو طالبان جنگچی لری ارا توقنشو جریانیده طالبان نینگ اون بیش جنگچی سی اولدیریلگن.

بادغیس ولایتی امنیت آمری شیرآقا الکوزی نی ایتشیچه بو واقعه اوتکن کیچه ( شنبه ۲۵ اسد) قادس تومن نی « قرچغی » قشلاقی ده امنیتی قوتلر پوسته لریگه قرشی طالبان جنگچی لری هجوم دن سونگ یوز بیردی. الکوزی جنابلری بو جنگ نتیجه سیده شونینگ دیک طالبان گروهی نینگ ۶ جنگچی سی یاره لنگن دیدی. او اما بو توقنشو نتیجه سیده امنیتی قوتلرگه یتکزیلگن احتمالی تلفات حقیده بیران نرسه ایتمگن.

عینی حالده بادغیس ولایت کینگاشی اعضالری، اوتکن کیچه مقرتومنی ده هم توقنشو یوزبیرگنی دن خبر بیریب بو جنگ ده طالبان جنگچی لریدن اون کیشی اولدیریلیب و نیچه کیشی یاره لنگن دیب ایتکنلر. بادغیس ولایت کینگاشی اعضاسی محمد ناصر نظری نی معلوم قیلیشیچه بو توقنشوده امنیتی قوتلردن بیرکیشی قربان بولگن و اینگ آز ۷ عسکرهم یاره لنگن.

طالبان گروهی حاضرگه قدر بو باره ده بیران نرسه ایتمگن.

بادغیس ولایتی سونگی کونلرده کوپلب ناتینچلیک لرگه گواه بولگن. بو ولایت نینگ بیر قطار تومنلری خصوصا قادس ده نیچه هفته  بیری امنیتی قوتلر و طالبان جنگچی لری ارا قتیغ جنگ لر دوام ایتیب بارماقده