ياشلر، مدني فعاللر و تينچليك مذاكره لر هياتي ني شمال و شمالشرق ده گي بيرقطار اعضالري اشتراكي بيلن تينچليك سوزلشوي عنواني ايله يغين اوتكزيلدي. بو يغين ده دولت نينگ مذاكره قيلوچي هياتي اعضالريدن فاطمه گيلاني و خالد نور انلاين روشده قنتشيب اشتراكچيلر سواللريگه جواب بيرديلر. بو يغين بلخ ولايتيده ديالوگ و ترقي ملي مركزي تمانيدن ريجه لنگندي.

بو يغين ده بير قطار عياللر و مدني فعاللر سوز ايركين ليگي، عياللر حقلري، انسان حقي، اساسي قانون قدريتلري، اوروش قربانلري عامللري قنداي محكمه ايتيليشي و سونگي ايگرمه ييل ليك يوتوقلر بويچه طالبان و دولت نماينده لري ارا بوليب اوتكن بحث لر باره سيده ايضاح بيريليشي ني طلب ايتيلدي.

بلخ  عالي اوقويورتي طلبه سي خانم مشعل دانش دولت نينگ مذاكره قيلوچي هياتي اعضاسيدن عياللر و قيزلر حقلري سقلنيشي بحثي ايككي تمان ارا بحثلر سرلوحه سيده جايلشتيريليشي ني طلب ايتي. خانم دانش همده صلح بويچه ياشلر و مدني فعاللر فكر وملاحظه لريني جمعلنيشي اوته مهم بولگني ني اورغولشدي.

باشقه تماندن بلخ عالي اوقويورتي علاقه واسطه لر طلبه سي مرمر حكيم صلح و تينچليك حاضرگه قدر فقط بير طلب اوله راق اورته گه قويلگن و مملكت يشوچيلريدن كتته قسمي طالبان صلح مذاكره لري موضوع سيدن معلوماتلري يوق ديدي. او، ناقرارليك و اوروشلر كوپيگني مملكت ده تعليم و تربيه آقيمي گه جدي صدمه اورگن ديدي.

عيني حالده دولت نينگ مذاكره قيلوچي هياتي اعضاسي خانم فاطمه گيلاني، يغين اورته گه قويلگن سواللرگه جواب بيريب ديدي اولكه ده اجتماعي صلح تامين لنگندن سونگ سياسي صلح نينگ قيينت يولي تيگيز راق بوله دي.

شونينگ ديك دولت نينگ مذاكره قيلوچي هياتي نينگ اينگ ياش اعضاسي خالد نور سوز ايركين ليگي موضوع سيني طالبان بيلن بحث اينگ مهم بحث بولگني اورغولشدي. او تاكيدلشدي اوروش بربانلري موضوع سي حاضرگه قدر ايككي تمان ارا بحث بولمگن.

باشقه تماندن ديالوگ وترقي ملي مركزي ريسي عبدالعزيز رحمتي بو مركز

صلح اوچون بير قطار بحث لرني اهالي گه كوپراق معلومات يتكزيش اوچون دولت نينگ مذاكره قيلوچي هياتي و اهالي نينگ تورلي طبقه لري ارا ريجه لشتيرگن ميز ديب ايتي.

رحمتي جنابلري علاوه ايتي طالبان ني محبسلردن قويب يوباريلگن محبوسلريني اوروش ميدانلريگه قيتيب كيليشلري ياشلرنينگ جدي تشويشلري ديركه بو صحبت لر جريان ده بحث بوله دي. ديالوگ و ترقي ملي مركزي رييسي گه كوره هرآي صلح سوزلشوي مملكت نينگ بير ولايتي ده يولگه قويليشي ريجه لنگن.

بو ياشلر، مدني فعاللر و دولت نينگ مذاكره قيلوچي هياتلري ارا بوليب اوتكن تورتينچي دستور دير كه بلخ ولايتي ده اوتكزيلگن.بوندن آلدين شونگه اوخشه گن برنامه لر بيرقطار ولايتلرده يولگه قويلگندي.