جوزجانده اوروش قاچقینلری اوچون ستندرد اردوگاهگه احتیاج بار
جوزجان ولایتی قاچقینلر ادارهسی رسميلری ولایت مرکزی شبرغان شهریده ایچکی آوارهلر اوچون ستندرد یششجای قوریش ضرورلیگینی تأکیدلهماقده. اولر نینگ فکریچه، معیاری یشش جای بولمگنی، آوارهلرنی رویخط ده آلیش و یاردم یتکزیش اوچون بو اداره و باشقه یاردمچی تشکیلات لرگه معما توغدیرگن ديدي.
جوزجان ولایتی قاچقینلر ادارهسي رییسی عبدالملک رستمي نینگ ایتیشیچه، سۉنگگی اوچ ییل ایچیده فاریاب، سرپل، قندوز و ولایت نینگ ناتینچ تومنلریدن ۲۰ مینگگه یقین عایله شبرغانده باشپناه تاپگن. جناب رستميگه کۉره، آخرگی ایکّی آی ایچیده شبرغان شهری اطرافیدهگی ۵۳ قیشلاقدن ۵ مینگگه یقین باشقه عایلهلر اوروش نینگ شدّتی طفیلی اۉز اوی جایلرینی ترک ایتیشگه مجبور بولگنلر.
بو آوارهلر، شو جملهدن باشقه ولایتلردن کېلگن قاچقینلر ، شبرغان نینگ خوفسیز جایلریده چادرلر آستیده یشهیدیلر. عبدالملک رستمي نینگ تأکیدلشیچه، حاضرده شبرغان نینگ اَیریم قِسملریده بېشته کیچیک اردوگاه بار. جناب رستمی، شبرغانشهریده آوارهلرنی جایلشتیریش اوچون حاضرچه باشقه بیر ستندرد اردوگاه گه احتیاج بار دیدی.
قاچقینلر ادارهسي باشلیغی بو موضوعني نادولت تشکیلاتلری بیلن اورتهگه قویگن، لېکن اولردن حلی ایجابي جواب آلمهگنینی قۉشیمچه قیلدی. عبدالملک رستمي ني ايتيشيچه ، آوارهلرگه خدمت کۉرسهتیش اوچون ستندرد اردوگاه تشکیل اېتیش، شو جملهدن خوفسیز ایچیملیک سووی، چېگره، تیکانلی سیملر بیلن تأمینلش، کۉچیریلگنلر نینگ خوفسیزلیگینی تأمینلش، حمّام و کوزهتوو جایلری قوریلیشی ضرور دیر
جناب رستميگه کۉره، ستندرد اردوگاه قوریش اوچون کمیده ۱۰۰ هکتار ییر کېرهک. جناب رستمی بو مهم مسأله جوزجاندهگی محلي حکومت وکیللری و قاچقینلر وزیرلیگی نینگ ملي و خلقارا همکارلری بیلن کېلیشیلگن حالده حل قیلینیشیگه امید قیلماقده.
حاضرگی وقتده بیر قطار آوارهلر شبرغان شهریده بېش کیچیک و وقتینچهلیک اردوگاهلرده استقامت قیلیشهدی. بو کیچیک اردوگاهلر آوارهلر تامانیدن خوفسیزلیک و حمایه واسطهلری سیز قوریلگن. شونینگ دیک فاریاب و سرپل کبی قۉشنی ولایتلرده هم ایچکی آوارهلر اوچون ستندرد اردوگاهلر یۉق.