جوزجان ولايتي مهاجرلر اداره سي مسوللريگه كوره ” اكتيد” دفتري بو اداره همكارليگي بيلن ٥٥٤ اوروش سبب آواره بولگن عايله لرگه نقد پول ياردم بيرگن. رسميلري اما ٣٦٤ عايله گه حاضرگه قدر هيچقنداي ياردم بولمگن ديديلر.

جوزجان ولايتي مهاجرلر اداره سي فوق العاده حالت لر بوليمي مسولي محسن مهجور بوكون ( چهارشنبه ٤ سرطان) نشانه خبر آژانسي بيلن صحبت ده ديدي:” اكتيد دفتري جوزجان ولايتي قاچقينلر اداره سي مصلحت و همكارليگي بيلن اوروش دن جبر كورگن هربير عايله گه ٩ مينگ افغاني نقد پول ياردم بيردي.” مهجور جنابلري علاوه ايتي بوندن قريب بيرآي الدين بو ولايت نينگ مرديان و منگجيت تومن لريدن بيرقطار عايله لر اوروش و ناقرارليك سبب آقچه تومني و ولايت مركزيگه آواره بولگنديلر. او، قاچقينلر اداره سي تيكشيرولريگه كوره ٩١٨ عايله اچنرلي اقتصادي حالت ده كونكيچيرماقده ديدي.

محسن مهجور اكتيد دفتري بو عايله لردن ٥٥٤ عايله نقد پول كمك قيلگن ديب و قالگن ٣٦٤ عايله گه باشقه ياردمچي موسسه لر ياردم يتكزيشي ني اميد قيلگن.

نورالله قل عايله سي بيلن مرديان تومني دن آواره بولگن عايله لردن بيري. او ديدي:” بيز جنگل اريغ قشلاقي ده قالين توقيب بوغداي ايكيب روزغارميزني اوتكزرديك اما بيرآي آلدين اوروش باشلنيشي بيلن بوغداي ايكنزارلري ميز اوت آلدي و اوزيميز هم قشلاق دن چيقيب قاچيش گه مجبور بولديك.”

او صحبت لري دواميده ديدي مني عايله ام آقچه تومني ده گي بير مكتب نينگ صنفيده حيات كيچيره دي. نورالله علاوه ايتي بيزنينگ قشلاقي ميزدن تومن مركزيگه چه ماين جايلشتيريلگني اوچون حاضر قشلاقي ميزده باره آلمي ميز.

جوزجان ولايت حاكم ليگي معلوماتيگه كوره بوندن بيرآي آلدين مرديان و منگجيت تومنلريده امنيتي قوتلر و دولت مخالف كوچلري ارا يوزبيرگن توقنشولر سبب ايككي مينگ دن كوپراق عايله اوز منطقه لريدن آواره بولديلر، بو آواره لردن بيرقنچه سي آقچه تومني مكتب لري و شيرغان شهريده خيمه لر آستيده كون كيچيرماقده لر.