ملي مصالحه عالي كينگاشي ريسي عبدالله عبدالله، افغانستان دولتي و طالبان نينگ مذاكره قيلوچي هيات لري يقين كونلرده اوچره شديلر ديب ايتكن. عبدالله جنابلري اولكه ده اوروش ني يكونلنتيريش اوچون، مملكت ايچكريسيده گي سياسي سيمالريدن، طالبان بيلن ينگي سياسي صحيفه آچيشلريني طلب ايتي.

عبدالله جنابلري بوكون( سه شنبه١٨ سنبله) كابل شهريده مملكت ملي چمبياني احمدشاه مسعود تروري اون توقيزييل ليگيني نشانلش مراسيميده، افغانستان دولتي و طالبان گروهي ارا يوز مه يوز مذاكره لر يقين كونلرده باشلنيشي دن خبر بيردي. عبدالله جنابلري ايككي تمان هياتلري بير خارجي مملكتده يوز مه يوز صلح مذاكره لرني باشليديلر ديدي.

طالبان گروهي و افغانستان دولتي نينگ مذاكره قيلوچي هياتلري نينگ بيرينچي دور مذاكره لري قطر پايتختي دوحه شهريده اوتكزيلماقچي. ايككي تمان طالبان نينگ يتي محبوسي قطرگه جونتيلگني دن سونگ يوز مه يوز مذاكره لر باشلنيشي اوچون تيارگرليك لريني اعلان ايتكنلر، اما حاضرگه قدر بو اچرشو معين تاريخي انيقلنمگن.

ملي مصالحه عالي كينگاشي ريسي شونينگ ديك مملكت ده ملي بيرليك و اجماع حقيده ديدي: ” بيز اوز اره ميز ده لرقلي نكته اي تظرگه ايگه ميز، گاهي بو فرقلي نقطه نظرلر بيزني بير حساس باسقيچده يتكزه دي، اما بيز افغانستان خلقي اوز اوي ميزده هيچ كيم بيلن دشمن ايمس ميز و طالبان بيلن دشمنليك صفحه سيني ياپماقچي ميز.”

مملكت ملي قهرماني احمدشاه مسعود تروري نينگ١٩ ييل ليگيني نشانلش مراسميده مملكت نينگ اكثر سياسي سيمالري قتنشكنديلر. تينچليك عالي كينگاشي ني سابق ريسي محمدكريم خليلي صلح اوچون يوز مه يوز مذاكره باشلنيشي باره سيده ديدي بو آقيم باشلنيشي اوچون هيچقنداي توسيق ايجاد ايتيلمسليگي لازم. خليلي جنابلري، مملكت نينگ برچه يشوچيلري عزتلي تينچليك تامين لنيشي طرفداري ديرلر، اما صلح اوتميش ده گي قرانگي دورگه قيتيش معناسيگه ايمس.

هرييلي مملكت ملي قهرماني تروري و باشقه جهادي سيمالري ييلي مناسبتي بيلن

بونداي مراسم اوتكزيله دي. افغانستان دولتي هم سنبله آيي ١٨ كونيدن ٢٥ سنبله گه چه جهاد و مقاومت شهيدلري هفته سي اوله راق تعين لشكن. شو سبب دن بوكون ( سه شنبه ١٨ سنبله) مملكت ده عمومي دم آليش كوني اعلان بولگن.