ملي يرشيش عالي كينگاشي رييسي عبدالله عبدالله طالبان تمانيدن زوروانليك لر شدت الگني دن تنقيدلب بو گروه سياسي امتياز كسب ايتيش اوچون زوروانليك لرني كوپيتيرمسليگي لازم ديب ايتكن.
ملي يرشيش عالي كينگاشي بوكون ( چهارشنبه ٢١ عقرب) نشر ايتكن خبرنامه سيده عبدالله جنابلري بو موضوع ني تاشكند ده اوزبيكستان تشقي ايشلر وزيري عبدالعزيز كاملوف بيلن اوچرشكنده بيان ايتكن. عبدالله جنابلري بو ملاقات ده ايتكن كه طالبان سونگي وقتلرده زوروانليك لرني كوپيتيرگن و بو موضوع جاري صلح آقيميده سلبي تاثير قالديريشي ممكن.
ملي يرشيش عالي كينگاشي رييسي طالبان سياسي امتياز آليش اوچون اوروشني شدت بيرمسليك لري لازم ديب تاكيدلشكن. عبدالله جنابلري مملكت ده اوروش و زوروانليك لرني كميتيريش ني بوگروه دن طلب ايتكن.
عبدالله جنابلري قطرده افغانستان دولتي و طالبان گروهي ارا تينچليك اوچون مذاكره لر زوام ايتيب باره ياتكان و مملكت ايچكريسيده اوروش لر زور آلگن پيت ده بو تنقيدلري اورته گه قويگن.
عبدالله عبدالله جنابلري افغانستان صلح مذاكره لري بويچه منطقوي اجماع ني كسب ايتيش مقصديده منطقه مملكت لريگه سفرلري دواميده اوتكن كوني توش دن سونگ بير عالي رتبه لي دولتي هيات باشچيليگيده اوزبيكستان پايتختي تاشكند گه سفر قيلدي.
اوزبيكستان تشقي ايشلر وزيري عبدالله جنابلري بيلن اوچرشكنده افغانستان تينچليك آقيميدن اوزبيكستان حمايت و ارقه داشليگي ني اعلان ايتكن. خبرنامه گه كوره كاملوف جنابلري بو ملاقات ده مملكتي افغانستان تينچليك و برقرارليك تامين لنيشي دن هرتمان له مه حمايت ايتيشي ني اظهار ايتكن.
اوزبيكستان تشقي ايشلر وزيري شونينگ ديك افغانستان ده تينچليك و برقرارليك تامين لنيشي منطقه ده دايمي برقرارليك گه قولي زمينه يرتيشي ني تاكيدلشكن.