افغانستان جمهىور رييسي محمد اشرف غني طالبان تمانيدن اعلان ايتيلگن اوچ كونليك آتش كيسيم ني القيشلب افغانستان امنيتي و مدافعوي قوتلريگه هيت كونلريده آتش كيسيم ني رعايه ايتيشلري اوچون بويروغ صادر ايتكن.
جمهور رييس ليك سراي بوكون ( دوشنبه ٢٠ ثور) بير خبرنامه نشر ايتيب جمهوررييس غني مملكت امنيتي و مدافعوي قوتلريگه هيت كونلريده آتش كيسيم ني رعايه ايتيش و يالغيز طالبان تمانيدن هجوم گه توتيلگني دن سونگ اوزلريدن مدافعه ايتيش ده بويروغ صادر ايتكني دن خبر بيرگن.
جمهور رييس ليك سرايي طالبان تمانيدن اعلان ايتيلگن آتش كيسيم ني آلقيشلب مملكت ده دايمي اتش كيسيم اعلان ايتيليشي ني طلب ايتكن. ارگ خبرنامه سيده زوروانليك دن ايش آليش، عادي اهالي قاني ني توكيش و عامه انشاعاتلرني ويران ايتيش ني جواز يوقليگي تاكيدلنيب و افغانستان دن خارجي قوتلرني چيقيشي باشلنگني بيلن طالبان اوروش مشروعيتي ني بوتكل قولدن بيرگني هم قيد ايتيلگن.
بو خبرنامه ده شونينگ ديك ايضاحلنگن كه طالبان مملكت ني تورلي ولايتلريده قيلگن هجوملريدن درس آليب بو گروه نينگ اوروش ميدانلريدن آلگن محاسبه لري ناتوغري و خطا دير. شونينگ اوچون ارگ طالبان تمانيدن دايمي آتش كيسيم اعلان ايتيليشي و مذاكره ميزي گه قيتيب كيليشي ني طلب ايتكن،
طالبان گروهي بوكون ايرته لب رمضان هيتي مناسبتي بيلن اوچ كونليك آتش كيسيم اعلان ايتي. بو گروه رهبري اوز جنگچي لريگه بو اوچ كون ده هرقنداي هجوم اويشتيريش دن قول تارتيش لريني بويريب، عيني دمده افغانستان امنيتي و مدافعوي قوتلريگه، بو گروه نظارتي آستيده بولگن منطقه لرگه كيليش گه اجازه بيرمسين لر ديب فرمان صادر قيلگن.