غنی: مملکتده تینچلیکنی تأمینلشده اېران و پاکستان نینگ رۉلی فعالراق بۉلیشی کېرهک
جمهوررییس محمد اشرف غنی اېران و پاکستاننی افغانستانده تینچلیکنی تأمینلشده فعالراق رۉل اۉینشگه چقیرهدی.
جمهوررییسلیک سرایی خبرنامسیده، جناب غنی اوشبو مسألهنی بوگون (۳۰-جوزا، یکشنبه) کابلده خلقارا قاچقینلر کونی نشانلش مراسیمیده اظهار ایتکن.
ارگ خبرنامسیده یازیلیشیچه، غنیجنابلری بو ایککی قوشنی مملکت افغانستانده برقرارلیکنی تأمینلشدن تارتینمسلیکلری و افغانستانده تینچلیکنی تأمینلشده فعالراق رۉل اۉینشلری کېرهکلیگینی تاکیدلشکن.
جمهوررییس غنی مملکتده دوام اېتتهیاتکان اوروش عامل و سببی طالبان گروهی ایکنیني ایتکن. اونگه کۉره، بو گروه آتشکیسیمدن باش تارتیب تینچ اهالینی اۉلدیریشده دوام اېتیرماقده و مملکتده موجود اوروشنی دوام اېتتیشیده مسوولدیر. جناب غنی خلقارا همجمعیت طالبانگه سیاسي مقام و اعتبار بیرگن دیدی.
قطرده تینچلیک جریانی بویچه حکومت و طالبان هیاتلری اۉرتهسیده تۉغریدن-تۉغری مذاکرهلر آلیب باریلهیاتگنیگه قرهمهی، غنیجنابلری بو اظهارات ني بیان ایتکن.