فاریاب ولایتی دهقان چیلیک و چاروادارلیک اداره سی میمنه شهریده سکیزمینگ دن کوپراق دهقانلرگه اصلاح بولگن بوغدای اوروغی ترقتکن. بوگل بو بوغدای لرگه قول تاپکن دهقان لر بو اصلاح بولگن دانه لر۶۰ فایز بهاسینی تاپشیرگن لر.

فاریاب ولایتی زراعت اداره سی ریسی عبدالکبیر فرزام بوکون ( شنبه ۲۴ غقرب) نشانه خبر آژانسی بیلن صحبت ده بو اداره فاریاب ولایتی نینگ برچه دهقانلریگه اصلاح بولگن بوغدای دانه سی ترقتیش ایشی نی باشله گن دیب ایتکن.

اونگه کوره بو دستور جریانیده ۴۰۸ متریک تن اصلاح بولگن بوغدای دانه لری بوتون ولایت نینگ سکیز مینگ و ۱۶۰ دهقانلریگه ترقلیشی نظر ده آلینگن.

فاریاب ولایتی زراعت اداره سی ریسی، اون ییل دن بیری الاح بولگن بوغدای اوروغی دهقان لرگه ترقلیش دستوری دوام ایتماقده دیدی. اونی علاوه قیلشیچه هر ییل نینگ اوتیشی بیلن فاریاب ولایتی ده بوغدای حاصلاتی مقداری کوپیماقده. فرزام جنابلری عینی دمده اوتکن ییل لرگه قرگنده دهقان لر اصلاح بولگن بوغدای دانه سی گه کوپراق مشتاق بولگن دیب ایتکن.

بو اصلاح بولگن دانه لر تیکین ترقتیلمی دی بلکه هر ۵ کیلوگرام بوغدای ۸۸۸ افغانی گه دهقان لرگه ساتله دی.

اوتکن ییل لرده اصلاح بولگن بوغدای دانه لری دهقان لرگه تیکین ترقلیدی. اما جاری ییلی فاریاب ولایتی زراعت اداره سی مسوولری بو دانه لر بهاسیدن ۶۰ فایزینی دهقان لردن آلیندی دیب ایتکنلر.

حاضرچه فاریاب ولایتی سیر محصول ایکنزارلرگه ایگه بولگنی گه قرگنده مملکت بویلب بوغدای صادر ایتوچی ولایت گه ایلنگن. هرییلی فاریاب ولایتی ده ۴۷۰ مینگ هکتار للمی ایکن زارلرگه بوغدای و باشقه دهقانچیلیک محصولات ایکیله دی.