كابل پوليسي ني ايتيشيچه كابل شهري تورت ناحيه سيده تيشيب پارتلگن ١٤ راكت، اوچ كيشي دن جان آلگن و ١١ كيشي ني ياره لنتيرگن. بو راكت لر اكثر قربانلري عادي اهالي بولگن.

كابل پوليسي سوزچيسي فردوس فرامرز ، بو راكت لر بوكون( شنبه بيرينچي قوس) ايرته لب ساعت٠٨:٥٠ دقيقه ده كابل شهري نينگ ايككينچي، تورتيتچي، اونينچي و اون بيرينچي امتيتي حوزه لريده تيشكن ديدي.

فرامرزجنابلري بو راكتلردن توقيزته سي تورتيتچي حوزه گه تيگيشلي بولگن چهارقلعه برق برجي، طاهري كوچه سي، نعمت پلازا، سلام عالي اوقوريتي يقين ده گل سرخ چهارراهه سي و ايككينچي امنيتي حوزه گه تيگيشلي صدارت چهارراهه سي، پل باغ عمومي، سپين جاده سي و ملي آرشيف يقينيده تيب پارتلگن ديدي.

فرامرزجنابلريگه كوره بيش راكت هم اونبيرينچي امنيتي حوزه گه تيگيشلي مريم ليسه سي و پنجصدفاميلي حدودلري و اونينچي حوزه كه قرشلي اهالي يشوچي منطقه لرگه تيب بارتلگن.

كابل پوليسي سوزچيسي حاضرگه قدر بو واقعه لر سبب اوچ كيشي اوز جاني ني قول دن بيرگني و ١١ كيشي ياره لنگني خبر قيلينگن. بو واقعه اكثر قربان لري عادي اهالي بولگني تاكيدلنگن.

حاضرگه قدر بو راكتلر آتيلگني مسووليتي ني هيچ بير شخص يا گروه اوز ضممه سيگه آلمگن. باشقه تماندن بو كون ايرته لب كابل شهريده ايككي پارتلش هم يوز بيردي. ميقاطيسي ماين پارتلشي نتيجه سيده امنيتي قوتلردن بيركيشي اولديريليب و اوچ كيشي ياره لنگن.