مملکت خوفسیزلیک کوچلری نینگ معاشی آشه دی
neshananews
01 August 2021مملکت خوفسیزلیک کوچلری قۉشمه سوزچیسی اجمل عمر شینواری نینگ ایتیشیچه، تېز آره‌ده مملکت خوفسیزلیک و مدافعه کوچلری نینگ معاشی آشه‌دی.
جناب شینواری بوگون (دوشنبه، ۱۰ اسد) کابل‌ده اۉتکزیلگن مطبوعات انجمنیده بو قرار جمهوررییس تامانیدن قبول قیلینگنینی و یقین آره‌ده عملگه آشیشینی ایتدی. شینواری جنابلری خوفسیزلیک کوچلری معاشیگه قۉشیله‌دیگن مقدار حقیده باتفصیل معلومات بېرمه‌دی.
حکومت و پارلمان اۉرته‌سیده جاري مالیه ییلی نینگ باشیده پست درجه‌ده‌گی دولت خدمتچیلری نینگ آی‌لیگی آشیریش رېجه‌سی جاري قیلینگن و حمل آیدن باشلب بو خادملر نینگ ایش حقینی آشیریش رېجه‌لشتیریلگن اېدی.
خوفسیزلیک خدمتلری نینگ قۉشمه سوزچیسی خوفسیزلیک کوچلری نینگ اوتکن بیر هفته دوام اېتگن عملیاتلر نتیجه‌لریگه ته‌یه‌نیب، اۉتگن هفته‌ده “طالبان” نینگ ۱۳۳۲ جنگچیسی اۉلدیریلگنینی، ۷۷۰ نفری یاره‌لنگنینی معلوم قیلدی.
او همده، هرات، قندهار و هلمند ولایتلریده‌گی خوفسیزلیک حالتیگه اشاره قیلیب، طالبان جنگریلری اوچ ولایت مرکزیگه هجوم قیلگنینی، لېکن مملکت خوفسیزلیک و مدافعه کوچلری طالبان هجوملرینی دفع ایتیش ده توله تیارگرلیک گه ایگه ایکنی نی قۉشیمچه قیلدی.
هرات گازرگاه مسجدی امام خطیبی مولوی مجیب‌الرحمن انصاری نینگ طالبان فایده‌سیگه ایتگن سۉزلریگه اشاره قیلیب، شینواری، اگر او ملي منفعتلر و ملي خوفسیزلیک‌گه قرشی گپیرگنی اثباتلنسه، جوابگرلیک‌گه تارتیلیشینی ایتدی.
مولوی مجیب الرحمان انصاري اۉتگن جمعه کونی طالبان طرفداری لیگده صحبت قیلگن. حج و اوقاف وزیری جناب انصاري‌نی چېت اېلّیکلر نینگ قلی دېب اته‌دی و خوفسیزلیک خدمتلریدن مولوی انصاری‌نی جنایي جوابگرلیک‌گه تارتیشگه چقیردی.
