هلمند ولايتي محلي رسميلري بو ولايت نينگ مركزي لشكرگاه شهري، نادعلي و سنگين تومنلريده حربي عملياتلر دوام ايتيب باريشي دن خبر بيرگن. رسميلر بو عملياتلر جريانيده طالبان گروهي نينگ ٢٣ حنگچي سي اولديريلگني ني تاكيدلشكن.

هلمند ولايت حاكمي مطبوعات بوليمي بوكون( سه شنبه ٢٢ ميزان) بيرخبرنامه نشر ايتيب امنيتي قوتلرني نادعلي تومني گه تيگيشلي بولگن باباجي منطقه سي و سنگين تومنيده تازه لش عمليات شدت بيلن دوام ايتگني دن خبر بيرگن. خبرنامه گه كوره امنيتي قوتلرني تورت پوسته سي طالبان نظارتي گه اوتكندي اما حاضر قيته امنيتي قوتلر نظارتيگه اوتكن.

خبرنامه ده لشكرگاه شهري، نادعلي و سنگين تومنلريده ملي اردو قوتلري يير و هوا عملياتلري نتيجه سيده طالبان نينگ ٢٣ جنگچي سي هلاك بولگني و آلتي جنگچي ياره لنگني تاكيدلنگن.

خبرنامه ده هلمند ولايت حاكمي، اوتكن كونلرده طالبان نظارتيگه اوتكن ولايت مركزي ايريم منطقه لري، نادعلي و سنگين تومنلري، قيته امنيتي قوتلر تمانيدن تصرف ايتيليشي دن ايشانچ بيلديرگن.

ايتيليشيچه طالبان جنگچيلري اوتكن ايككي كونده هلمند ولايتي مركزيگه قرشي آغير هجوملرني يولگه قويديلر.

امنيتي قوتلر و طالبان ارا توقنشولر بو ولايتي آغير خساره لر يتكزگن. بونگه قوشيمچه هلمند ولايتي قاچقينلر اداره سي طالبان هجومي دن سونگ ٤٠٠ دن كوپراق عايله اوز اوي جايلريدن آواره بولگني ني ايتكن.

هلمند ولايتي ده زوروانليك لر اونداي بيرحالده شدت آلگن كه طالبان امريكا بيلن امضالشكن كيليشونامه ده شهرلرگه قرشي هجوملرني توختتيش دن وعده بيرگندي.شو سبب دن امريكاني كابل ده گي ايلچي خانه سي بوكون ايرته لب نشر ايتكن خبرنامه ده طالبان دن هلمند ولايتي ده گي هجوملريني توختتيش ني طلب ايتي، اما طالبان گروهي حاضرگه قدر بيران نرسه ايتمگن.