پارک سینماسی اویلیشی گه مناسبتلر؛ سینما قتلی کیچیک مقیاس ده بودا قتلی گه اوخشیدی
neshananews
09 November 2020مملکت نینگ بیرقطار سیاستچی و مدنی سیمالری کابل شهرنو ده جایلشکن پارک سینماسی کابل بلدیه سی تمانیدن اویلشی گه آلینگن قرار گه نسبتن مناسبت کورستکنلر. بو مدنی سیمالر پارک سینماسی اویلیشی نی کیچیک مقایاس ده بودا هیکلی اویلیشی گه قیاشلشکنلر.
کابل بلدیه سی گه کوره کابل شهرنو منطقه سیده جایلشکن پارک سینما سی بناسی اویلیش ایشینی بوکون ( دوشنبه ۱۹ عقرب) باشله گن. بو حرکت جمهوررییس بیرینچی اورین باسری امرالله صالح تمانیدن آلینگن قرارگه اساسن عملی بولماقچی. اما بیرقطار مدنی سیمالر، سیاستچیلرو مملکت اهالی سی بو حرکت گه قرشی لیک کورستکنلر.
مملکت تنقیلی صنعتکاری فرهاددریا بیرآچیق مکتوب نشر ایتیش بیلن جمهوررییس بیرینچی اورین باسرینی خطابلب یازگن:« پارک سینماسی اویلیشی، اونی اورنیده بیران باشقه بنا قوریلشی دن قطع نظر، بامیان ده بودا هیکل اویلگنی بیلن چندان فرقی یوقک» دریا جنابلری بو مکتوب ده کابل یالغیز بیرشهر ایمس؛ بلکه بیرمدنیت دیر. پارک سینماسی کابل شهری نینگ بیرارزگولیک مدنی بنالریدن بیری دیر و اونی اویلیشی کابل مدنیتی نی اویش معناسینی انگلته دی.
دریاجنابلری، جمهوررییس بیرینچی اورین باسری و کابل شهردارلیگی نی پارک سینماسی اوییشی دن وازکیچیش گه چارلب بو مدنی بنا قیته قوریلیشی لازم لیگی نی اورغولشکن.
عنی دمده مملکت تنیقلی یازوچی سی خالد نویسا، پارک سینماسینی حاضرچی شرایط ده اوییشی نی اونگه کوره « آشفته لیک شاهکار قیلگن» ناتوغری اته‌گن. باشقه تماندن لندن ده‌گی مملکت مشهورخبرنگاری ضیا شهریار هم بو سینمانی اویشی باره سیده حکومت قره‌شینی « شهکار» اتب یازگن:« هیچ بیرمحاسبه بیلن تصور قیله آلمی میزکه بیر شاشیلینچ حرکت و هیچقندای مصلحت بولمی کابل ده بیرتاریخی بنا نابودلیگی گه قرار آلینگنی یخشی ایش ایمس.»
عینی دمده افغانستان نینگ بیرلشکن ملت لر تشکیلاتی ده‌گی سابق نماینده سی، پارک سینماسی اویلیشی نی « ویران لیک اوچون قدرت کورستیش» دیب ایتکن. او تعصب، قلابکارلیک و فسادنی قدرت کورستیش بیلن مشورعیت بیریش ناممکن دیر» صیقل جنابلری مدنی بنالر جمله دن پارک سینماسی اویلیشی اورنیده قیته قوریلیشی لازم. او اگر حکومت مدنی بنالرگه رغبتی بولسه، باشقه جایلرنی بوندای مدنی بنالر قوریش ده اجرتیشی لازم دیب یازگن.
افغانستان لیک سینماچی کاظم ریحان هم بو باره ده یازگن بو سینمانی اوییش در حقیقت کابل نینگ روح، مدنیت و تاریخی نی ایاغ آستیده قویش دیر. او کابل بلدیه سی بو ایش دن واز کیچیش کیرک دیگن. شونینگ دیک مدنی جماعه مشترک گروهی سکرتریتی ریسی عبدالله احمدی بو ایش هیچ صورت ده قبول قیلینرلی ایمس دیب یازگن. احمدی جنابلری بو سینما قیته قوریلیب و فعال بولیشی نی طلب ایتکن.
عینی حالده جمهوررییس مدنی مصلحت چی سی شاه حسین مرتضوی مملکت یشوچی لری نی پارک سینماسی نی اویش دن تشویش و خواتیرلرینی توشینرلی بولگنی نی تن آلیب کابل بلدیه سی باشلیغی گه تکلیف قیلگن که پارک سینماسینی اویشی نی کیله سی بیرهفته گه چه کیچکه قالدیرسین. بو تکلیف دیمک کابل بلدیه سی تمانیدن جدی آلینمگن.کابل شهردارلیگی مسووللری پارک سینماسی اویلیش ایشی دوام ایتیشی دن خبر بیریب و بو ایش توختتیلمس لیگی نی اعلان ایتکن.
بو تنقیدلرگه قره‌می جمهوررییس بیرینچی اورین باسری امرالله صالح اما بو سینما تیزراق اویلیشی نی تاکیدلشکن. او تنقیدچی لرگه جوابن یازگن:« بعضی لرنی نوستالوژی و تویغولرینی توشینه من اما بو شخص لر بو باره ده تبصره یازیش اورنیده شهر نفسی نی تازه لش اوچون ایشلش لری لازم دیر.»
ععینی دمده کابل نینگ پارک سینماسی بو شهرده ۱۸ نمایش تالاریدن بیری دیر که ایچکی اوروشلر جریانیده هم فعال ایدی. کابل شهردارلیگی معلوماتی گه کوره، بو سینما بوندن ۶۵ ییل آلدین قوریلگن و طالبان دورانی دن باشقه همه وقت ده دایم سینما مشتاق لری یوزیده آچیق ایدی.
کابل بلدیه سی نی تاکیدلشیشیچه بو سینما بناسی قیته قوریش ده قابلیتی یوق و شو سبب دن اویلیشی لازم. امرالله صالح جنابلرینی ایتیشیچه بو سینما اورنیده باشقه بیر مدنی بنا قوریلماقچی و بو ینگی بنادن نیچه مقصدگه ایش آلینیشی ممکن.
