پاكستان جمهور رييسي عارف علوي  افغانستان ملي مصالحه عالي كينگاشي رييس عبدالله عبدالله بيلن اوچرشكنده پاكستان افغانستان اوروشي دن جدي ضرر زيان كورگن ديب ايتكن.

ملي مصالحه عالي كينگاشي بوكون( چهارشنبه ٩ ميزان) بير خبرنامه نشر ايتيب ايتكن بو كينگاش رييسي عبدالله جنابلري بوكون توش دن آلدين پاكستان جمهور رييسي عارف علوي بيلن اوچرشدي. خبرنامه ده، علوي جنابلري بو اوچرشوده پاكستان افغانستان اوروشي دن ضرر زيان كورگن و بو مملكت ده تينچليك تامين لنيشي ني اوز منفعتي گه بيله دي ديب تاكيدلشكن. اونگه كوره شو سبب دن اسلام آباد افغانستان ده تينچليك تامين لنيشي اوچون جاري سعي و حركت لردن حمايت ايته دي.

پاكستان جمهور رييسي اوز صحبت لري دواميده، پاكستان عالي تعليمات، تكنالوژي و ساغليك ني سقلش بويچه افغانستان بيلن همكارليك لريني آشيريش ده تيار دير ديگن. اوني معلوم قيليشيچه ايككي مملكت ارا تجارتي علاقه لر ميزاني آشيريليشي كيرك و افغانستان تينچليك تامين لنگن دن سونگ مركزي آسياني جنوبي آسيا بيلن باغلش نطقه سيگه ايلنيشي لازم ديب ايتكن.

باشقه تماندن افغانستان ملي مصالحه عالي كينگاشي رييسي عبدالله عبدالله هم بو اوچرشو ده افغانستان تينچليك آقيمي موفقيتي ني منطقه مملكت لري و خصوصا” پاكستان همكارليگي گه باغليق اته دي.

ملي مصالحه عالي كينگاشي خبرنامه سيگه كوره عبدالله جنابلري بو اوچرشوده افغانستان تينچليك تامين لنيشي منطقه ترقيات و رواجلنيشي اوچون قولي و ييريك فرصت ني مساعد ايته آله دي ديگن.

عبدالله جنابلري نينگ اوچ كونليك سفري پاكستان ده ايككي كون آلدين باشلندي. عبدالله جنابلري بو سفر ده پاكستان دولتي يوقاري ملازم لري بيلن اوچرشيب مذاكره قيلدي.بو سفردن سونگ كابل و اسلام آباد ارا همكارليك لرنينگ ينگي موسومي باشلنيشي كوتيلماقده.