کنرولایتی محلی رسمیلری، پاکستان حربی تمانیدن بو ولایت مروره تومنیگه قرشی آتیلگن راکتلر بیر باله دن جان آلیب و بوتومن یشوچیلریدن تورت کیشی نی یاره لنتیرگنی نی تصدیق لشکن.

کنرولایت حاکمی سوزچیسی عبدالغنی مصمم بوکون ( دوشنبه ۲۸ میزان ) نشانه خبر آژانسی بیلن صحبت ده دیدی بو راکت لر اوتکن کونی مروره تومینگه تیگیشلی بولگن « ترخو اوبه » قشلاقی نی نشان گه توتکن. مصمم جنابلری بو راکت لر بیر یشش اوی گه تییب پارتلگنی سبب بو قشلاق اهالی سی بولگن بیر عایله نی بیر باله سی دن جان آلیب و تورت کیشی نی یاره لنتیرگن.

جنوبی کنر ولایتی گه قرشی پاکستان حربی لری نینگ راکت هجوملری نیچه ییل دن بیری دوام ایتماقده. بو هجوملر دوام ایتیب باریشی کوپلب عایله لرنی اوی جایلریدن آواره قیلگن.

عینی حالده افغانستان ملی امنیت عمومی اداره سی نی اعلان قیلشیچه بو اداره کابل شهریده طالبان و داعش گروهی عملیات مرکزی نی انیق لنتیریش گه موفق بولگن. اما بو اداره بو خصوص دن کوپراق تفصیلات بیرمگن. سونگی وقتلرده کابل و مملکت نی باشقه بیرقطار ولایت لری مثل سیز ناقرارلیک لرگه گواه دیر. امنیتی قوتلر ایسه بو ناتینچلیک لرآلدینی آلیش دن ایشانچ بیلدیرگن