چيگره سيز زورناليست لر تشكيلاتي افغانستان ده خبرنگارلرگه قرشي ريجه لنگن هجوملر دوام ايتيب باريشي دن خواتير اظهار ايتكن. بو تشكيلات مسووللريگه كوره اوتكن ٦ آيده افغانستان ده ايگرمه ژورناليست ريجه لنگن هجوملردن تاثير لنگن.
بو تشكيلات بوكون ( دوشنبه ١٣ ثور ) سوز ايركين ليگي خلق ارا كوني مناسبتي بيلن نشر ايتكن راپوريده، افغانستان ده تينچليك مذاكره لر پروسه سي باشلنگني دن سونگ سوز ايركين ليگي و اخبارات واسطه لر وضعيتي يمان راق بولگنيني اعلان ايتكن.
بو راپورده ژورناليست لرگه قرشي ريجه لنگن هجوملر و كرونا ويروسي ييرليشي سبب اقتصادي معمالري كوپيگني، افغانستان اخبارات واسطه لريگه فاحعه لي تاثير يتكزگني اورغولنگن.
بو راپورگه كوره اوتكن آلتي آي جريانيده ايگرمه خبرنگار ريجه لنگن هجوملردن تاثير لنگن. بو آره دن تورت عيال خبرنگار داخل سكيز ژورناليست بو هجوملرده اوز جانلريني قولدن بيرگن و اون ايككي خبرنگارهم ياره لنگن و صدمه كوررگن. شونينگ ديك بو مدت ده ٣٠ خبرنگار و رسانه ملازم لري قوراللي گروه لر تمانيدن تهديد بولگن.
چيگره سيز ژورناليست لر راپوريگه اساسا” خبرنگارلرگه قرشي حكومت تمانيدن كورستيله ياتكان باسيم لرگه علاوه سانسور موضوع سي هم افغانستان دن سونگي وقت لرده كوپيگن.
بو تشكيلات افغانستان حكومتي تي سوز ايركين ليگي و رسانه لر آزادليگي قدريت لرگه نسبتا” دقت اعتبار قرتيشي ني طلب ايتيب و دولت دن خبرنگارلر خوفسيزليگي ني سقلنيشي اوچون جدي راق چاره تدبير قول اوستيده اليشيني ايستشگن.
عيني حالده بو بيلن بيرگه غربي مملكتلر و خلق ارا تشكيلاتلرني افغانستان ده گي وكالتخانه لري افغانستان ده سوز ايركين ليگي قدريتلري سقلنيشي و خبرنگارلر خوفسيزليگي تامين لنيشي ني طلب ايتكن.