عسكرليك دوراني شيرين و اچيغ خاطره لر و حكايتلردن توله و عسكرلر شوخاطره لربيلن حيات كيچيره ديلر.

اولر بو دوران نينگ اچيغ خاطره لريني بيرليرلري يانيده شيرين قليب و شيرين ليك لريني شير راق قيله ديلر.

اوروش آلارمي ينگره شي بيلن بو عسكرلر اوروش ميدانيده سنگرداشي كيم دير، آتي نمه، قيسي قوم دن دير، قي سي تيلده سوزليدي، قييردن كيلگني گه قره مي ، يان مه يان، اكه اوكه ديك كورشه ديلر. بو داستان هر كون تكرار بوله دي و بو معروف جمله كه “بيركيشي همه اوچون، همه بير كيشي اوچون” انه شونداي حالت ده معنا تاپه دي.

مينگ لرچه حكايت و داستان آره سيدن بريدمل غلام يحيا حكايتي ني سيزگه تقديم ايته ميز. او اون بير ييل دن بيري ملي اردو صفي ده ماين كشف ايتيش و بيكار قيليش بوليمي ده وظيفه بجره دي.

اون بير ييل، بير عمر دير.غلام يحيا بو مدت ني ، اصلا اولرني يقين دن كورمگن سانسيز عيال، ايركك و باله لر اوچون وقف قيلگن، احتمال غلام يحيا بولمگنده بولردن كوپچيليك لري او بيكار قيلگن مينگلب ماين دن بيريني باسيب فاجعه يوز بيريشي گه گواه بولسه لر ايدي. اما غلام يحيا بار و اوز وظيفه سيني بجريشده عزم و اراده سي كوچلي.

بو كونلر جوزجان حربي عملياتي ده قتنشكن بريدمل غلام يحيا محمدي  نشانه خبر آژانسي خبرنگاري بيلن اوچرشكنده صحبتي ني ملي اردو صفي ده گي كونده ليك حياتي حكايه سيدن بونداي باشله دي : ” غلام يحيا محمدي من، شاهين قول اردو سي ايككنچي لواسي نينگ ماين تازه لش تولي ده بريدمل صفتيده وظيفه بجره من و حاضرهم فيض اباد تومني ده يولگه قويلگن عمليات ده قتنشكن من، كونده ليك ايشيم مخالف لر تمانيدن جايلشتيريلگن ماين لرني تاپيب بيكارقيلش دير”

حربي عمليات ده اشتراك ايتكن بريدمل محمدي ” طالبان گروهي، شاه يوللر حدوديده كيچه تمانيدن ماين لرني ييرلشتيره ديلر ، مني وظيفه ام ماين لرني تاپيب بيكار قيليش دير. شو اوتكن اوچ كون جريانيده حاضرگه قدر بيش ماين ني تاپيب بيكار قيلديم”ديدي.

هر كوني افغانستان ده، عموما دولت حربي لريگه ضربه يتكزيش مقصديده دولت مخالف قوتلري تمانيدن يول چكه لريده جايلشتيريله ياتگان ماين لر پارتلشي اونلبچه عادي اهالي دن جان آله دي. بو توغريده غلام يحيا قويدگيچه فكر بيلديره دي: ” اون بيرييل ليك خذمت دوامي ده يوزلب ماين ني تاپيب بيكار قيلگن من، ملي اردو صفي ده گي ايناغه لريم و وطنداشلريم حياتي و جان لريني قوتقريشيم دن فخر  لنه من”.

بريدمل غلام يحيا شمال و شمالشرق زون لريده يعني بدخشان دن توتيب فارياب گه چه وظيفه بجرگن. او خوفسيزليك مساله لر اوچون توغلگن جايي و عايله سي حقيده معلومات بيريش ني ايسته مي اما باشقه ايتيله يلتگان سوزلري بار: ” اولكه ميزده تينچليك برقرار بوليشي و برچه وطنداش لريميز مهر و محبت دن توله فضا ده يشب بو اولكه نينگ آب و هوا سي و كوكلمزار لريدن لذت كوريشلري كتته ارزوم دير” ديدي.

اوروش ده آته لر فرزندلريني و فرزندلر آته لريني توپراققه تاپشيره ديلر. شبهه سيز هر بير انسان ني اوروش دن نفرتي بار ، شونينگ ديك محمدي جنابلري هم اوروش دن نفرتي كتته بولگني ايتيب اوروش حقيده بونداي فكر بيلديره دي:” اوروش دن نفرتم بار، افغانستان اهالي سي بويني گه يوكلنتيريلگن بو اوروش بير كون ايمس ، ببر كون يكون تاپه دي و انشالله همه ميز تينچليك ده حيات  كيچره ميز”.

بريدمل غلام يحيا ني طالبان جنگچي  لريگه هم ايتيله ياتگان سوزي بار: ” اگر دولت قوراللي مخالف لري خصوصا طالبان افغانستان وطنداشي بولسه لر مكتب لر و دولتي اداره لرني ويران ايتمسليك لري لازم، شونينگ ديك سرك و شاه يوللرني بوزمسليك لري كيرك، اولر تينچليك پروسه سيگه قوشيليش بيلن اوز اولكه لريني آبادان لشتيريشي گه حصه قوشيش لري شرط” ديدي غلام يحيا.

هر بير آته و آنه و عايله نينگ آرزو سي، فرزندلري تينچ فضاده يشيب اوسيشي دير.اوز عايله سي حقيده معلومات بيريش دن وازكيچكن غلام يحيا كورينيشي دن آته دير و بو اولكه فرزندلريگه نسبتن آرزوسي هم قيزيق:” هر بير عسكر آته ني آرزوسي شوكه باله لري تينچ فضاده مكتب اوقيب كتته بولسه”.

بريدمل غلام يحيا محمدي نشانه خبر آژانسي خبرنگاري نينگ ملي اردو ده ديني تعليمات حقيده گي سوالي گه بونداي جواب بيردي:” هر بير قول اردو ده عقيدتي – مدني امريت بار و اردو عسكرلري هميشه بيش وقت نمازلريني اوقيب و رمضان مبارك آي ده ختم قران لر اوتكزه ديلر”.

غلام يحيا محمدي كوپ مدت دن بيري اويي گه بارمگن و نشانه خبر آژانسي ارقلي نشر بوله ياتگان عكسلريني عايله سي كوريب سوزلريني اوقيشي ني كوتماقده.بيز تورلي زمان لرده حربي عمليات لردن علاوه حاجتمند عايله لرگه بشري ياردملر هم يتكزيب و سوتاشقيني يا قار سيلجيشي حادثه لري يوز بيرگن تقدير ده اهالي گه ياردم بيره ميز ديدي غلام يحيا.

بو جسور عسكر هنوز اجتماعي ترماق لرده اشتراك ايتكنيم يوق ديب فيسبوك، واتساپ و بونگه اوخشه گن نرسه لريم يوق ديدي و شونينگ اوچون اوز دوستي قول تلفن نمبريني بيريب بو صحبتي و عكسلريني جونتيليشي ني طلب ايتي. غلام يحيا نشانه خبر آژانسي بيلن صحبتلشكندن بي حد خرسند؛ چونكه عايله ام عكسم ني كوريب و مردم هم داستانيم ني اوقيديلر ديدي.

بريدمل غلام يحيا مردم دن امنيتي قوتلرني دستكلش و حمايت ايتيشلريني ايستب، افغانستان خلقي گه چين دل دن آسايشته ليك و تينچليك آرزو ايته دي.