زهرا حسيني؛ ييريك آرزولري بيلن كارخانه ايجاد ايتكن
neshananews
23 March 2020«تجارت عيال، ايركك ني تانيميدي و يالغيز بير ايش ني باشلشده كيرك بولگن نرسه،تشبث،فكر و سعي و حركت دير.»
بو جمله، سرپل ولايتي ده سومكه تيكيش و تعليمي بير كارخانه ني ايجاد ايتكن زهرا حسيني ني ايتكن سوزي دير. او بوندن آلتي ييل آلدين UONPS دفتري همكارليگي بيلن بو كارخانه ني ايجاد ايتيب و حاضرگه قدر اوز شخصي سرمايه سي بيلن كارخانه ايشي ني دوام ايتيريب كيلماقده.
خانم حسيني، بو كارخانه ني ايجاد ايتيش بيلن ٢٢ عيال گه ايش زمينه سيني مساعد ايتيب ايشي ني رواج رونق بيريش بيلن بو ولايت نينگ باشقه بيرقطار عياللريگه هم ايش زمينه سيني مهيا ايتيش ني قصد قيلگن.
حسيني گه كوره مردم عياللر تمانيدن باشقريله ياتگان كسب و كار گه ايشانچلي بولمگن لري سبب عياللر كوپگينه معمالربيلن يوزمه يوز ديرلر.
اما بونگه قره مسدن او و همكسبلري باشله گن ايشلريني اورينلي قيليشدن وازكيچ مگنلر و سرپل اهالي سي بو كارخانه محصولاتي ني آلقيشلگن لري باعث بو كارخانه ايشي هم كون اوتيشي بيلن رواجلنيب بارماقده.
بو ياش سوداگر بو كارخانه نينگ كونده ليك ايشي قنداي كيچيشي حقيده ديدي:
«بو كارخانه نينگ خام اشياسيدن بير قسمي ني چين دن و قالگني ني كابل بازاريدن مهيا ايته ميز،اما سونگي كونلرده چيگره لر ياپيلگني و خام اشيا بولمگني سبب كارخانه ايشي بير آز قيينتچليك لرگه دچار بولگن. ليكن بيزنينگ كارخانه ميزده ايشلب چيقاريله ياتگان متاعلر چين و پاكستان دن كيلتيريله ياتگان اشيالردن كوره اوته صفتلي دير.»
حسيني، پايتخت كابل دن اوزاق توشكن ولايتلر و قشلاقلرده عياللر ايشلري قرشي سيده تورگن توسيق لرگه قره مسدن؛ بيز اوز كارگاه ميزني اوزاق توشكن بير قشلاق ده فعال سخلش گه موفق بولگن ميزدن فخرلنه ميز ديدي.
او بو باره ده ايضاح بيردي كه: «بيز اوز ايشي ميزني باشله گنده ، مردم امنيتي خوف و تشويشلر و عنعنوي عرف و عادتلر سبب عيال و قيزلريگه شهر و دولتي اداره لرگه باريشگه رخصت بيرمسديلر و حتي شو باعث بو ايش ني حكومت نظارتي آستيده آلغه سوريش ده بيزني مجبور قيلرديلر اما من عكسينچه بير خصوصي بانك دن قرضه آليب و ايشيم ني اوز قشلاقيم ده باشلب قشلاق داش عياللرگه ايش زمينه سيني مساعد ايتديم.»
حسيني خانم گه كوره عايله نينگ حمايتي عياللر موفقيتي گه اساسي حصه قوشه آله دي، اگر عايله عياللردن حمايت ايتسه، عياللر اوز مقصد و غايه لريگه تيزراق ايرشه آله ديلر.
او هرچند دايم اوقوتوچي ليك گه قيزيقردي و شو سبب حاضر باله لر باغچه سيده هم معلم دير اما اقتصادي جهت دن عياللرني مستقل بوليشي ني اوته مهم اتب شونينگ اوچون اوز تشبثي و استقلاليتي گه تينيب بو كارخانه ني ايجاد ايتيش ده سعي قيله باشلدي.
حسيني كارخانه سي، سرپل و جوزجان ولايتلريده رسمي ارگانلردن قرارداد آليب عيني دمده اكثر خصوصي مكتب لر، ديني مدرسه لر و خارجي دفترلر، كيرك بولگن اشيالريني بو كارخانه دن ساتيب آله ديلر. زهرا حسيني نينگ اينگ كتته آرزوسي بوتون افغانستان بويلب اوز ايشيني رواجلنتيريش و يقين كيله جكده بو آرزوسيگه ايرشيشي ني اميد قيلماقده.
قیزلر رویالری؛ جوزجان ده پینگ پانگ
