رمضان آیی باشلنیشی بیلن « دفترخدماتی و انکشافی قویاش» ناملی بیر خیریه جمعغرمه جوزجان ولایتی مرکزی شبرغان شهریده اوروش آواره لریدن ایککی مینگ عایله گه هر کونی آذوقه ترقتیب کیلماقده. بو خیریه جمغرمه مسوللری بو انسان پرورلیک حرکت دن مقصدلری حاجتمند عایله لرکه یاردم یتکزیش دیب ایتکن.

 بو خیریه بنیاد مسولی نورمحمد قاریزاده نشانه خبر آژانسی بیلن صحبت ده دیدی:« آواره لرگه ترقتیله یاتکان بو آذوقه بودجه سی نی چیت ده یشه یاتکان بیرقطار افغانستان لیک لر تامین لیدیلرو بیزهرکونی اوروش سبب اوی جایلریدن آواره بولگن ایککی مینگ عایله گه پیشیغ اوقات تیارلب ترقته میز.» قاری زاده جنابلری علاوه ایتی ایشسیزلیک، اوروش دوام ایتیب باریشی و مملکت شمالی ده کون اوتیشی بیلن آرتیب باره یاتکان ناقرارلیک سبب آواره لریمان احوال ده کون کیچیرماقده لر. قاریزاه جنابلری باشقه خیریه جمغرمه لردن هم بو آواره لرگه یاردم یتکزیش لرینی طلب ایتکن.

عینی دمده جوزجان ولایت حاکمی سوزچی سی عبدالمعروف آذر بو خیریه بنیاد حرکتی نی آلقیشلب دیدی:« بخت گه قرشی بوییل اوروش و ناقرار لیک لرسبب شبرغان شهری، قوشنی ولایتلر و جوزجان ناتینچ تومن لریدن آواره بولگن یوزلب عایله لرمیزبانی دیر.» اونگه کوره خیریه جمغرمه لر و نادولت موسسه لرنی بوندای انسان پرورلیک حرکت لری حاضرگی شرایط ده دولت ایلکه سیده‌گی آغیرمسولیت یوکی نی کمی تیریش ده ییریک حصه قوشکن.

مرادبای بوندن بیرییل آلدین فاریاب ولایتی دولت آباد تومنی دن آواره بولیب شبرغان شهریده کون کیچیرماقده.او حاضر۸ کیشی دن عبارت بولگن عایله اعضاسی بیلن چادر آستیده یشه ماقده. مرادبای دیدی:« قشلاق میزده اوروش دوام ایتیب باریشی سبب اوز محل میزده یشش گه قادر بولمه دیک و جانی میزنی سخلش اوچون،  بار و یوق میزنی چاروالرگه یوکلب منطقه دن قاچیش گه مجبور بولدیک.» فاریاب ولایتی دولت آباد تومنی دن آواره بولگن مرادبای علاوه ایتی عایله ام بیلن یشه یاتکان بو کمپ ده فاریاب ولایتی ناتینچ اولسوال لیک لریدن آواره بولگن ایککی یوز دن کوپ راق آواره عایله لر یشه ماقده.

جوزجان ولایتی قاچقین لراداره سی معلوماتی گه کوره اوتکن بیرییل جریانیده شبرغان شهریده باش پناه آلگن آواره لرسانی اون مینگ عایله گه یتیب بارگن.