بدخشان ولايتي جرم تومني ده طالبان گروهي و امنيتي قوتلر ارا سونگي توقنشولر عاقبتيده “دهن خستك” ،”آب راغك”،”فرغاميرو” و ” پل سوج” قشلاقلري يشوچي لريدن قريب ٣٠٠عايله اوز اوي جاي لريدن اواره بوليب جرم تومني مركزيگه باش پناه آلگن لر. بدخشان ولايت كينگاشي اعضالري و جرم تومني يشوچيلريني ايتيشيچه بو عايله لر يمان اقتصادي احوال ده كون كيچيريب و محلي حكومت و ياردم يتكزوچي موسسه لر تمانيدن هيچقنداي ياردم بولمگنلر.

بدخشان ولايت كينگاشي اعضاسي احمد جاويد مجددي نشانه خبر آژانسي بيلن صحبت ده ديدي بو عايله لر تيزياردم گه ضرورتلري بار. اونگه كوره بو عايله لر قشلاق لريگه قرشي طالبان قوراللي لري هجومي كوپيگني سبب بير آي آلدين اوي جاي لريدن اواره بولگن لر.

مجددي جنابلري بو آواره لر بار و ياغ لريني قولدن بيريب دولت نظارتي آستيده بولگن منطقه گه پناه كيلتيرگن، اما كون كيچيريش اوچون مناسب جاي بولمگني و آذوقه كمچيليگي اوچون جدي قيينتچيليك گه دچار ديرلر ديدي.

بدخشان ولايت كينگاشي بو اعضاسي تاكيدلشدي:” قولدن كيتگن منطقه لرني قيته آليش اوچون و “خستك” منطقه سيني طالبان دن تازه لش اوچون هرتمان له مه حربي عمليات يولگه قويلمسه، بو منطقه ده خارجي جنگچي لرحضوريگه نقطه قويش اوچون وقتينچه ليك عمليات لر تاثيرسيز دير.” خستك منطقه سي، دولت مخالف لري اصلي و دايمي قرارگاه سي بوليب خارجي جنگچي و تروريست لر مركزي گه ايلنگن.

عيني حالده محل يشوچي لري هم نيچه ييل دن بيري بو منطقه لرده دولت مخالف قوراللي گروه لري حضوري و ناتينچليك لر كوپيگني سبب طالبان نظارتي آستيده بولگن قشلاق يشوچيلريدن يوزلب عايله اوي جاي لريني ترك ايتيب دولت حاكميتي آستيده گي منطقه لرگه پناه كيلتيريب يمان احوالده كون كيچيرماقده ديدي لر.

جرم تومني يشوچي سي عيان الدين ديدي:” طالبان قشلاقي ميزگه هجوم قيلگن وقت ده و دولت بو گروه جنگچي لري هجومي ني دفع ايتيش اوچون هوايي عمليات يولگه قويدي، بيز اوي جاي ميزني ترك ايتيش ده مجبور بولديك و تينچ منطقه لرگه پناه كيلتيرديك.” قشلاقي طالبان تمانيدن باسيب آلينگني دن سونگ جرم تومني مركزيده قرينداشلريدن بيري نينگ اويده عايله سي بيلن كون كيچيره ياتكان عيان الدين، كونده ليك روزغاريني اوتكزيش اوچون ايش بولمگني سبب كوپ قيينتچيليك گه دچار ايكني ني ايتيب علاوه ايتي:” اوروش آواره لري تومن مركزي و دولت نظارتي آستيده بولگن منطقه لرگه پناه كيلتيرگن و اولردن كوپراقي ني باش پناه سي يوق و بيرقطارلري هم قرينداشلري اوي لريده يعني هر اوي ده اوچ ، تورت عايله بيلن حيات اوتكزيش گه مجبور ديرلر.” بو آواره لر بدخشان محلي حكومتي و ياردمچي موسسه لر تمانيدن هيچقنداي ياردم يتكزيلمگني ني ادعا قيليب و ياردمچي موسسه لر دقت اعتباريني جلب ايتيش اوچون برچه سعي و حركتلري حاضرگه قدر نتيجه سيز قالگن ديديلر.

بدخشان ولايتي جرم تومني آواره لري، باربار محلي حكومت دن منطقه ده حربي عمليات يولگه قويليشي و قشلاقلريني طالبان نظارتي دن چيقاريش ني طلب ايتكن لريني تاكيدلشكن اما بدخشان محلي حكومتي بو طلب گه حاضرچه جواب بيرمگن ديب ايتكن.

جرم تومني محلي رسميلري تخميني گه اساسا” سونگي ييللرده يوزبيرگن ناتينچليك لر نتيجه سيده قريب بيرمينگ عايله طالبان نظارتي آسيتيده گي منطقه لردن اواره بوليب دولت حاكميتي منطقه سيده پناه كيلتيرگن. بدخشان محلي رسميلري ديديلر  اوتميش ده گي جنگلر سبب اواره بولگن عايله لر برچه سي رويخط ده آلينگن و منتظم روشده طبيعي حادثه لرگه قرشي كورش اداره سي و خلق ارا موسسه لر تمانيدن ياردم قولگه كيلتيره ديلر. اما تازه ليك ده آواره بولگن عايله لر تيزياردم لرگه قول تاپيب و رويخط ده الينماقده لر و يقين كيله جكده منتظم ياردم لردن بهره مند بوله ديلر.

بدخشان ولايتي طبيعي حادثه لرگه قرشي كورش اداره سي ريسي عبدالله همايون دهقان نشانه خبر آژانسي بيلن صحبت ده ديدي:” اكتيد موسسه سي جرم تومني نينگ خستك منطقه سيدن سونگي اوروش لر عاقبتيده آواره بولگن ٧١ عايله گه نقدي ياردم قيلگن و قالگن عايله لرگه هم ياردم يتكزيش ده سعي قيلماقده ميز.” اونگه كوره بو ياردمچي ارگان هر عايله گه ١٨ مينگ افغاني گه تينگ آذوقه ياردم بيرگن و جرم تومني نينگ باشقه آواره لريگه هم نقدي ياردم يتكزيليشي ريجه لنگن ديدي. دهقان جنابلري، بدخشان ولايتي نينگ طبيعي حادثه لرگه قرشي كورش و قاچقين لر اداره لري، ياردمچي موسسه لر همكارليگي بيلن بو آواره لر و حاجتمند عايله لرگه ياردم يتكزيش رويخطي ني تيارلماقچي. بدخشان محلي رسميلريگه كوره بو ولايت اواره لري ساني ٦٢٠٠ عايله دير و بولردن ٤ مينگ عايله سي اوروش آواره لري دير كه بهارك، جرم، اشكاشم تومنلري مركزي و فيض آباد شهريده باش پناه آلگنلر.بدخشان محلي اداره سي هرچند محلي اداره لر و ياردمچي موسسه لر بو آواره لرگه ياردم يتكزيشي ني ايتماقده لر اما بو عايله لر هلي هم تورلي قيينتچيليك لرگه يوزمه يوز ديرلر.