جوزجان ولايتي زراعت اداره سي گه كوره دهقان لر قيزيقيشي سبب الويرا اوسيمليگي اوستيريشي بو ولايت كوپيگن. رسميلرني ايتيشيچه بو ولايت نينگ خواجه دوكوه تومنيده اونلب دهقان بو اوسيمليك ايكيشي كه يوزكيلتيريب و يخشي نتيجه صاحل قيلگنلر ديب تاكيدلشكنلر.

جوزجان ولايتي زراعت اداره سي مسوللري الويرا اوسيمليگي سونگي وقتلرده مشتري لر دقتي ني اوزيگه قرتيب و بو اداره بو اوسيمليگ ني قنداي ايكيش و اوستيريش ني دهقانلرگه تعليم بيرگن ديب ايتكن.

جوزجان ولايتي زراعت اداره سي اوروغلرني اصلاح قيليش بوليمي مسولي شفيق الله تلاش، جاري شمسي ييلده بو اداره الويرا اوسيمليگي ني قنداي ايكيش و اوستيريش طريقه سيني ٥٠٠ دهقان گه معياري روشده اورگتكن ديدي.

بو متخصص گه كوره بو ساحه ده تعليم كورگن دهقانلر شبرغان شهري و خواجه دوكوه تومنيده بو اوسيمليگ ني ايكيشي ده يوز كيلتيريب و اوتكن ييل گه قرگنده ٩٥ فايز مثبي نتيجه آلگن.

ببرقطار جوزجان ليك دهقانلر بو ولايت ده الويرا اسيمليگي رواجلنگني دن خرسندليك بيلديريب الويرا محصولي نرخي بلند بولگني سبب يخشي عايدات قولگه كيلتيريش دن راضي ديرلر.جوزجانليك دهقانلردن بيري محمدنادر ديدي بيرييل دن بيري اوز عايله سي روزغاريني انه شو اوسيمليك آرقلي تامين لشماقده و بوني فايده سي كوكنار ايكمي دن كوره جوده بلند دير ديدي.

شونينگ ديك الويرا اوسيمليگي ني ساته ياتكان شخصلر هم سونگي وقتلرده الويرا ايكني و حاصلاتي كوزگه كورنرليچه كوپيگني و بو ماده ني مشتري سي هم آرتكن ديب مردم بو اوسيمليك دن ساغليك ني سقلش ژل اوله راق استفاده قيله ديلر ديب ايتكن. شبرغان شهريده الويرا ساتوچي بشير احمد، بو اوسيمليك مردم دقتيني اوزيگه جلب ايتكني و بوندن آلدين بو ماده ني ساتيش اوچون كابل دن كيلتيريب ساترديم اما حاضر جوزجانليك دهقانلر اوستيرگن محصول ني ساتماقده من ديدي.

سونگي ييللرده جوزجان ولايتي ده تورلي خيل ميوه و سبزوات يشيلخانه لرده اوستيريش ايشي رواج رونق تاپدي و ولايت مركزي و بيرقطار تومنلرده كوپلب دهقانلر بو طريقه دن فايده لنماقده لر.