جوزجان ولايتي بير قطار مدني فعاللري، شبرغان شهريده تازه قوريلگن بير يول وضعيتي ني نطارت قيليش دن سونگ، بوسرك موترسايكل و ارابه لرني تعيرلش جريان ده چكش كارليكلر سبب تخريب بولماقده ديب اعلان ايتكنلر. بو مدني فعاللرگه كوره بو سرك ايككي يانيده موترسايكل ، ارابه و تيميرچيليك دوكان لر جايلشكني سبب سرك ده چكش كارليك، ياغ توكليشي و تيميرچليك ايشلر باعث تخريب بولماقده.

جوزجان مدني فعاللريدن و انسان حقلري كميسيوني رضاكارلريدن بيري سيد رسول سادات نشانه خبر آژانسي بيلن صحبت ده ديدي:” انچه مدت دن سونگ سبرغان شهريده بير كيلومتر ينگي سرك قوريلدي اما بخت گه قرشي بو سرك تيميرچيلر و نقليه واسطه تعميرچي لري وسيله سي بيلن تخريب بولماقده.” سادات جنابلري علاوه ايتي نيچه ييل دن بيري بيرقطار سرك لر اسفالت بوليشي كوتيلماقده اما سياسي معامله لر سبب هنوزگه چه اوني ايجابي ايشلري باشلنمگن.سادات جنابلري گه كوره جوزجان محلي حكومتي دقتسيزليگي سبب شبرغان شهري قيته قوريش ايشلردن محروم قالگن. سيد رسول سادات گه كوره عامه سركلر و كوچه لر بيت المال ملكيتي دير و اهالي هم بو عامه ملكيتلرني اسرش و محافظتي اوچون اعتبار قرتيشلري لازم.

جوزجان مدني فعاللري بو معماني برطرف ايتيليشي يگانه يولي تيميرچي لر و نقليه واسطه تعميراتي اوچون علاحيده ماركيتلر قوريليشي شرط ديدي. جوزجان مدني فعاللري دن ينه بيري محمد بشير فروغ گه كوره سركلرني محافظت مسوليتي شهردارليك و عامه منفعتلرني سقلش اداره لري ضممه سيگه دير و امنيه قوماندن ليگي هم بو توغريده همكارليك قيليشي شرط.

باشقه تماندن بو سرك يانيده موترسايكل تعمير قيليش دوكاني بولگن فيروز ديدي:” اگر دولت بيزلر اوچون بير مناسب محل و جاي نظرده توتسه بيز ايشي ميزني اوشه محلده انتقال ببريش ده تيارميز.” او علاوه ايتي سرك بيت المال ملكيتي دير و بيز مجبوريت دن اسفالت بولگن سرك يوزيده ايشلي ميز.

عيني حالده جوزجان عامه منفعتلر اداره سي باشليغي نشانه خبر آژانسي بيلن صحبت ده ديدي:” اداره ميز نيچه بار سرك ايككي يانيده فعاليت قيله ياتكان دوكاندار و تعميرچي لر بيلن سرك تخريب ايتيليشي آلديني آليش اوچون صحبتلشكن، اما اولر عتمه منفعت ار اداره سي مصلحت و توصيه لريگه توله اعتبار قرتمگنلر.” اوني معلوم قيليشيچه جوزجان ولايت حاكم ليگي و شبرغان شهردارليگي امنيتي اداره در ببلن بو سرك تخريب ايتيليشي آلديني آليش خصوص ده جديدقرار آليشي ضرور.

عامه منفعت لر اداره سي ، عامه محللرني اسرش مسوليتي شهردارليك ضممه سيگه ايكني ني تاكيدلب هرچند بيز حاضرگه قدر بو سرك ني شهردارليك اداره سيگه تسليم بيرگني ميز يوق اما سرك ايككي تمانيده فعاليت قيله ياتكان كسبه كار بلديه اداره سيگه تيگيشلي دير ديدي. كارگر جنابلري تازه ليكده قوريلگن بيركيلومتر بولگن بو سرك جوزجان – سرپل ارا ٥٠ كيلومتردن عبارت پروژه گه تيگيليشي بولگني و بو پروژه ده ٥٠٠ ميليون افغاني دن كوپراق نبلغ صرفلنگن ديدي.

باشقه تماندن شبرغان بلديه باشليغي انجنير محمد حسين صالح ديدي:” هنوزگه چه مردم عامه ملكيت لريده مالكيت حس قيلميديلر و شوني اوچون مردم گه توشينتيريش لازم كه سرك لر و تمل بنالر مردم ملكيتي دير و اهالي اوني محافظت قيليشي ده جدي اعتبار قرتيشلري لازم دير،”

صالح جنابلري علاوه ايتي بلديه باربار دوكاندارلرگه سرك تخريب بوليشي آلديني آليش ده دقت قرتيشلريني طلب ايتكن. اوني معلوم قيليشيچه شبرغان شهردارليگي اشبو مقصد اوچون بير مخصوص كميته ايجاد ايتكن و بوكميته گه امنيتي اداره لر ، حج و اوقاف و مدني جماعه اعضالري داخل دير و يقين كونلرده اهالي گه معلومات بيريش عملي ايشلرني باشليديلر.

شبرغان بلديه سي معلومات لريگه كوره سبرغان شهريده قريب ١٧ كيلومتر سرك اسفالت بولگن و ايريم قيينتچيليك لر سبب هنوز بلديه بو سركلرني تسليم آلمگن. شبرغان شهريده يقين كيله جكده قريب ٣٥ كيلومتر سرك اسفالت و كانكريت ايشي باشلنه دي.