افغانستان خبر و مدنیت وزیرلیگی، افغانستان دولتی و طالبان گروهی ارا یوز مه یوز مذاکره لرده رسانه و خبرنگارلر حضوری تاپیشلری لازم لیگی نی تاکیدلشکن.

خبر و مدنیت وزیرلیگی نشراتی معاونی عبدالمنان شیوای شرق بوکون ( چهارشنبه ایککینجی میزان) کابل ده بیرخبری یغین ده دوحه ده دوام ایتیب باره یاتکان مذاکره لرده خبرنگارلر حضوری لازم لیگی نی تاکیدلشدی. شرق جنابلری گه کوره افغانستان خبرنگارلری و رسانه لری، افغانستان دولتی و طالبان گروهی ارا مذاکره لر جریانیدن مردم گه معلومات بیریش یتکزیش ده حق لری بار.

شرق جنابلرینی علاوه ایتیشیچه معلومات لرگه قول تاپیش قانونی گه مطابق، معلومات سانسوری و آلدینی آلیش ناقانونی دیر و حکومت رهبریتی، افغانستان دولتی و طالبان گروهی نینگ مذاکره قیلوچی هیاتلری دوحه یغینی ده خبرنگارلر حضوری زمینه سینی مساعد ایتیش ده مسوول دیرلر.

عینی دمدع بیرقطار رسانه لر مسووللریهم بو یغین ده مذاکره قیلوچی تمانلردن مذاکره لر تفصیلاتی نی اهالی گه یتکزیش اوچون خبرنگار حضوریگه زمینه یرتیلیشی نی طلب ایتکن لر. جمله دن کلید گروپ ریسی نجیبه ایوبی دیدی دوحه ده خبرنگارلر حضوری گه فقط ۷۲ ساعت وقت بیریلگندی. اونگه کوره کرونا ویروسی ییرلیشی آلدینی آلیش بهانه سی دن سونگ تانیلمگن شخص و تمانلر خبرنگارلرنی معلومات یتکزیش گه توسیق یرتیلر. خانم ایوبی تاکیدلشدی حکومت خبرنگارلرنی دوحه یغینیده قتنشیش امکانیتی نی مساعد ایتیشی لازم.

افغانستان دولتی و طالبان گروهی نماینده لری ارا یوز مه یوز مذاکره  لر ۱۷ کون آلدین ( ۲۲ سنبله ) دوحه شهریده باشلندی. بو مذاکره لرنی باشلنیش مراسمیده خبرنگارلر حاضر ایدی اما ۷۲ ساعت دن سونگ خبرنگارلر افغانستان گه قیتیریلدیلر و حاضر اکثر رسانه لر افغان لر ارا مذاکره لر تفصیلاتی نی اوزاق دن ترقته دیلر.