ملا برادر: مملکتده مستقل و سیاسي اسلامي تیزیمنی اۉرنهتیش جوده ضرور
طالبان گروهی نینگ سیاسي معاونی ملا عبدالغنی برادر نینگ ایتیشیچه، مملکتده مرکزي و مستقل اسلام تیزیمینی برپا اېتیش کېرک.
ملا برادر بوگون ( شنبه۲۶ سرطان) دوحهده افغانستان حکومتی نینگ یوقاری درجهدهگی هیاتی بیلن اوچرهشووده تینچلیک جریانیگه ایشانچسیزلیکنی یۉقاتیش کېرکلیگینی ایتدی.
جناب برادر نینگ قۉشیمچه قیلیشیچه، تمانلر هیاتلری اۉرتهسیدهگی تۉغریدن-تۉغری تینچلیک مذاکرهلری، باشدن حاضرگهقدر یخشی رواجلنمسه هم، طالبلر حاضرگی تینچلیک جریانی ایجابي نتیجهلرگه اېریشیشگه صادق دیر.
عبدالغنی برادرنی تأکیدلشیچه، اوروشنی توختهتیش و افغانستان خلقیگه تینچلیکنی تأمینلش نینگ یگانه یۉلی بو مملکتده مرکزي و مستقل اسلامي تیزیمنی یرهتیشدیر. اونگه کۉره، مملکتده اوروشنی توختهتیش اوچون برچه تمانلر خودبینلیکدن واز کېچیب، شخصي منفعتلریدن قول تارتیشلری کېرک.
طالبان گروهی نینگ سیاسي معاونینی تأکیدلشیچه، افغانستان بو مملکت نینگ برچه اهالیسی نینگ قوشمه اویی دیر و بو اولکهدهگی هر بیر انسان خدمت قیلیش و جوابگرلیکنی اۉز ذمّهسیگه آلیشگه حقلیدیر.
ملا برادر نینگ تأکیدلشیچه، یوکسک مقصدلرگه اېریشیش اوچون برچه تمانلر اۉزلرینی قربان قیلیشلری و باشقه تماننی کینگ کونگیل بیلن قبول قیلیشلری کېرک.
عینِ پیتده، ملي یرهشیش عالي کېنگاشی رئیسی عبدالله عبدالله هم مملکتده تینچلیک اۉرنهتیش اوچون موجود امکانیتدن اونوملی فایدهلنیش ضرورلیگینی تأکیدلب، بو فرصت بېکارگه چیقمسلیگی لازم دیب ایتدی.