قطر ده افغانستان دولتي و طالبان نينگ مذاكره قيلوچي هياتلري سوزلشولريدن باخبر منبع لر، ايككي تمان نينگ هياتلري يوز مه يوز مذاكره لر ايش دستوري بويچه كيليشكنلريدن خبر بيرگن.

بو راپورده اسمي يازيليشي ني ايسته مگن منبع لردن بيري بوكون ( دوشنبه ٣ قوس) نشانه خبر آژانسي بيلن صحبت ده ديدي افغانستان دولتي و طالبان گروهي مذاكره قيلوچي هياتلري، امريكا و طالبان ارا مذاكره لر كيليشونامه سي، كابل – واشنگتن اعلاميه سي و افغانستان تينچليگي بويچه بيرلشكن ملت لر تشكيلاتي خوفسيزليك كينگاشي ني حوت آيي ايگرمه سيده صادر قيلگن قراري، تينچليك مذاكره لر اساسي آلينيشي ده كيليشيلگن.

منبع گه كوره بو كيليشو افغانستان دولتي مذاكره قيلوچي هياتي ريسي معصوم استانكزي و طالبان نينگ مذاكره قيلوچي هياتي ريسي مولوي عبدالحكيم نينگ يوز مه يوز اوچرشولريده حاصل بولگن. بو منبع ني علاوه قيليشيچهبو كيليشو نشر ايتيلگني دن سونگ، معصوم استانكزي جمهور رييسي غني حمايتي ني كسب ايتيش اوچون آلدين دن اعلان ايتيلمگن بير سفر ده كابل گه كيلگن. اونگه كوره جمهور رييس غني بو كيليشوبيلن موافق بولگن تقديرده مذاكره قيلوچي هياتلر ارا حاصل بولگن كيليشولر يقين كونلرده نشر ايتيلماقچي.

افغانستان دولتي و طالبان نينگ مذاكره قيلوچي هياتلري سنبله آيي آخرلريدن ٢٠ ماده دن عبارت بولگن بو ايش دستورني يكونلنتيريش اوچون صحبت لشيب كيلگن لر. معلوماتلرگه كوره بو كيليشو قطر دولتي ياردمي بيلن حاصل بولگن.

باشقه تماندن امريكا تشقي ايشلر وزيري مايك پومپيو هم ايككي كون آلدين دوحه گه باريب افغانستان دولتي و طالبان هياتلري بيلن علاحيده اوچرشدي. پومپيو جنابلري ايككي هيات اعضالريگه، بير مناسبب نتيجه گه ايرشيش اوچون اوز ارا مذاكره لريني دوام ايتيريش ني توصيه قيلگن.