” موج تحول افغانستان” حزبي اعضالريدن اونلب كيشي تينحليك مذاكره لري نتيجه گه ايرشيشي اوچون مملكت ده عمومي آتش كيسيم برقرارليگني طلب ايتكن.

بو حزب اعضالري بوكون( پنجشنبه اوچينچي ميزان) كابل ده بير خبري يغين ده قطرده دوام ايتب باره ياتكان تينچليك مذاكره لري بيلن عيني زمانده اوروش دوام ايتيب باريشي ني بو آقيم گه نسبتا” اهالي ايشانچ سيزليگي گه سبب بوله دي ديب ايتكن.

بو حرب عالي اعضالريدن بيري مونسه مبارز بو خبري يغينده ديدي طالبان تينچليك مذاكره لرده بير كيليشو حاصل بوليشي يوليده يخشي نيت لريني كورستيش اوچون آتش كيسيم اعلان ايتيش لري لازم دي.

خانم مبارز گه كوره مملكت ده اوروش توختتيليشي و آتش كيسيم برقرار بوليشي تينچليك مذاكره لريگه نسبتا” اهالي ايشانچي ني قوللب قوتليدي.

عيني حالده بو حزب ينه بير اعضاسي مرضيه احمدي، آتش كيسيم برقرار بولمگني و زوروان ليك لر كممگني بيلن قطر مذاكره لري نتيجه سيز قاليشي ممكن ديدي. اوني معلوم قيليشيچه يالغيز مملكت ده زوروانليك لر كميشي و آتش كيسيم برقرار ليگي بيلن افغانستان دولتي و طالبان گروهي نينگ مذاكره قيلوچي هيات لري فكر و ملاحظه لري بيربيريگه يقين لشيب بير سياسي كيليشو زمينه سيني مساعد ايته آله دي.

موج تحول حزبي نينگ بو اعضاسي شونينگ ديك قطر يغيني اجندا سي هنوزگه چه انيق لنمگني ني صلح مذاكره لريگه نسبتا” اهالي نينگ ايشانچسيزليگي گه تاثير قالديرگن ديب مذاكره تمانلري دوحه يغيني اجندا سي موضوع لريني تعين لشلري كيرك ديدي.

افغانستان دولتي و طالبان گروهي ارا يوز مه يوز مذاكره لر قطر ده دوام ايتماقده. ايككي تمان حاضرگه قدر بو مذاكره لرنينگ ايش طريقه سي بويچه كيليشه آلمگن.بو خصوص ده كيليشو حاصل بولگن دن سونگ ايككي تمان ارا رسمي مذاكره ار باشلنماقچي.