كوپلب مدني سيمالر و افغان فيلم ريسي نينگ دواملي سعي و حركتي گه قره مي، كابل بلديه سي پارك سينماسيني اويدي.
جمهور رييس بيرينچي اورين باسري امرالله صالح اون كون آلدين (٩ عقرب) پارك سينماسيني اويليشي گه نسبتن ارگ قراريني اعلان ايتكن ايدي. صالح جنابلريگه كوره بو سينما بنگي و معتادلر و مخدره ماده لرني ساتيوچيلري مركزيگه ايلنگن و بو بنا اويليشي لازم ليگي ني ايتكن. بو قرار اعلان ايتيلگني دن سونگ، كوپلب مدني سيمالر، سينماچيلر، صنعتكارلر و كابل يشوچيلري بو مدني بنا اويليشي گه نسبتن قرشيليك لريني اطهار ايتيلر.اما بو اعتراضلر ثمره بيرمدي.
نهايت ده افغان فيلم رييسي صحرا كريمي بو سينما اويليشي گه اعتراض بيلديريب دوشنبه كوني توش دن سونگ بو سينما سالني ايچكري سيده سينما اويليشي آلديني آليش مقصديده تحصن باشلدي. كابل بلديه سي اما پوليس قوتلريدن فايده لنيب خانم كريمي ني سينمادن حيقاردي و پارك سينماسي اويليش ايشيني باشله دي.
خانم كريمي نشانه خبر آژانسي بيلن صحبت ده ديدي پوليس جمهور رييس بيرينچي اورين باسري امرالله صالح فرمانيگه اساسن زوروانليك دن ايش اليب اگر سينما بناسيني ترك ايتمسه بنا ديواريني اوني باشيگه اويش دن آگاهلنتيرگن.
افغان فيلم رييسي و باشقه كوپلب مدني سيمالر نزديده تاپيلگن سوراغ و سوال شو كه نيگه صالح جنابلري بو سينما بناسي اويليشي دن بونچه ليك اصرار قيلماقده؟
بوندن آلدين جمهور رييس مدني مصلحتچي سي شاه حسين مرتضوي دوشنبه كوني ايرته لب فيسبوك صحيفه سيده، كابل بلديه سيگه بو سينما اويليشي ايشي ني نيچه كون كيچگه قالديريشي ني تكليف قيلگندي. اما كابل شهردارليگي مرتضوي جنابلري ني بو تكليفي گه هيچ اعتنا قيلمه دي.
مملكت نينگ تتيقلي شاعرلري، يازوچيلري و صنعكارلري هم بو مدني بنا اويليشي گه اعتراض بيلديريب جمهور رييسليك سراي و كابل بلديه سيدن بو بنا اويليشي آلدي آلنيشي ني طلب ايتكنديلر. بو آره ده مملكت تنيقلي صنعتكاري فرهاد دريا بير آچيق مكتوب ده حكومت دن بو سيمنا و خصوصن صنعت و هنرني نمايش ايتيره ياتكان بو بنا اويليشي آلدي ني آليشي ني طلب ايتكندي.اما بو اعتراض و مناسبت لر نتيجه بيرمدي و نهايت ده كابل بلديه سي بو مدني بناني دوشنبه شامي( ١٩ عقرب) بوتكل اوييدي.
كابل شهرنو منطقه سيده جايلشكن سينما پارك بناسي بوندن ٦٥ ييل آلدين قوريليب مملكت نينگ دايم فعال سينمالريدن بيري ايدي. جمهور رييس بيرينچي اورين باسري و كابل بلديه سي بو بنا اورنيده بير مدني مركز قوريليشي دن خبر بيرگن.
صالح جنابلري بو پارك مخدره ماده لر معتادلري مركزيگه ايلنگن ديب و شو سبب دن اويليشي لازم ليگي ني اورغولشكن.
اجتماعي ترماقلر فعاللري اما صالح جنابلري نينگ بو دليلي ني قانعقرلي بيلمي كابل ده كوپلب محل لر جمله دن پل سوخته و كابل درياسي هم مخدره ماده لر معتادلري مركزيگه ايلنگن و آيا حكومت بو محل لرني هم اوييه مي ديب سوال قيلگن لر.
اجتماعي ترماقلر فعاللري صالح جنابلري بو دليلي ني قانعقرلي بيلمي امنيتي قوتلر بير مدني و تاريخي بنا ني اوييشي اورنيده اوني امنيتي ني تامينلب مخدره ماده معتاد لريني اوييردن چيقاره آليشي ني تاكيدلشكنلر.اما حاضرگه قدر جمهور رييس بيرينچي اورين باسري نينگ اصراري سببي نامعلوم قالگن.