افعانستان دولتي‌نینگ قطرده‌گي مذاكره‌قیلوچی هیاتی ریسی محمدمعصوم استانکزی قطر امیری‌ني صلح بویچه مخصوص نماینده‌سي بیلن اوچرشوده تینچلیک مذاكره‌لر اوچینچی دوریده وقت ضایعه بولمسلیگی ني تاکیدلشکن.
افعانستان دولتی مذاكره‌‌قیلوچی هیاتی اخبارات دفتری بوکون ( سه شنبه ۱۸ جوزا) بیر خبرنامه نشر ایتب استانکزی جنابلری بو موضوع‌ني اوتکن کونی قطر مملکتی ني افعانستان تینچلیگی بویچه مخصوص نماینده‌سي مطلق القحطانی بیلن اوچرشکنده اورته‌گه قویگنی دن خبر بیرگن.
استانکزی جنابلری بو اوچرشوده مذاكره‌لرنی اوچینچی دوریده وقت‌ني اولدیریش و حاشیه‌رولیک دن وازکیچیش ضرورتي گه تاکیدلشکن. او افعانستان‌نینگ مذاكره‌قیلوچی هیاتی سوزلشولرنی باشلش اوچون بوتکل تیارگرلیگی بار دیب بو مذاکره‌لر هرقنچه تیزراق باشلنیشی ایستشکن.
سونگی کونلرده صلح پروسه‌سي قیته باشلنیشی اوچون کابل و قطرده سعی و حرکت لر شدت آلگن. آمریکا و اروپا اویشمه‌سی نماینده‌لری منطقه‌گه سفر قیلیب دولت و طالبان‌ني مذاكره‌قیلوچی هیات‌لرنی مذاكره‌لرنی باشلشده ترغیب ایتکن.
اوتکن ایککی کون جریانیده افعانستان دولتی نینگ مذاكره‌قیلوچی هیاتی، طالبان تمانی‌ني وقت‌کشلیک گه عیبلشکندی اما طالبان ایتکن که دولت هیاتی قرارآلیشده کوچی یوق دیب ایتکن.