مملكت ملي امنيت عمومي اداره سي ني اعلان قيليشيچه بو اداره نينگ خاص قوتلري بير مخصوص عمليات ده ننگرهار ولايتي ده ريجه لنگن بير خودكش هجوم آلديني آليش گه موفق بولگن. بو انتحاري هجوم داعش گروهي نينگ خراسان قناتي تمانيدن بجريليشي ريجه لنگندي.
ملي امنيت اداره سي بوكون شام( يكشنبه ٦ ميزان) بير خبرنامه نشر ايتيب يازگن بو عمليات ده ننگرهار ولايتي سطحي ده پارتلش لر مسولي بولگن قاري قاسم گه مشهور رحيم الله، داعش گروهي خراسان قناتي اعضالريدن آلتي كيشي بيلن بيرگه توتقين ده آلينگن. خبرنامه گه كوره بوگروه ننگرهار ولايتي ده امنيتي و مدافعوي قوتلر باشليغ لريني قوم باشليغ و تنقلي سيمالري بيلن ريجه لشتيريلگن يغين ني نشان گه توتماقچي ايكن.
خبرنامه ده شونينگ ديك، ملي امنيت اداره سي قوتلري نينگ بو عملياتي ده نيچه خودكش هجوم جليقه لري، پارتلوچي ما ه لر، راكت اندازلر داخل بير مقدار آغير و ينگيل قوراللر قولگه كيلگن.
عيني حالده اوتكن اسد آيي اورته لريده بجريلگن و ٢١ كيشي اولديريلگن و ٢٣ كيشي ياره لنگن ننگرهار ولايتي مركزي قماقخانه سيگه اويشتيريلگن هجوم مسوليتي ني داعش گروهي نينگ خراسان قناتي اوز ضممه سيگه آلگندي.