بدخشان ولايتي خوش آب و هوا، باشي آسمان گه يتكن تاغلر، جوشقين دريالر، اورمانزارلر، تاريخي ميراثلر، وحش حياتي، كوكلم و اوزيگه خاص جغرافياسي بيلن سياحتچي ليك اوچون مناسب زمينه لرگه ايگه بولگن ولايت دير.

بدخشان نينگ سياحتچي ليك قيزيقيش لري سبب هرييلي كوپلب خارجي و ايچكي سياحتچي لر بو ولايت گه سفرقيله ديلر.
جهان بويچه شهرت تاپكن و اوتميشلرده ايتاليا ليك سياح ماركوپولو تمانيدن شو اسم گه مسما بولگن بدخشان نينگ ماركوپولو كيهيكي بو ولايت نينگ پامير تاغ لريده يشيدي.

بدخشان نينگ پامير تاغلريده كمياب حيوان خصوصا ماركوپولو كيهيكي، مارخور ايشكي، پلنگ برفي و هايبكس كبي جانوارلر يششي سبب سياح لر دقت مركزيگه جايلشيب و بو ولايت ده سياحتچيليك رونق تاپيش گه كتته حصه قوشكن.

بدخشان محلي رسمي لريگه كوره اوتكن ييل لرده سياحت چليك صناعتي ناتينچليك لر كوپيگني سبب صدمه كورگندي و سياح لر امنيتي تهديدلر سبب بو ولايت كه سفرقيليش دن باش تارترديلر.
بدخشان محلي رسمي لري اما بير ييل دن بيري امنيتي وضعيت يخشي راق بولگني آرتيدن سياحت چليك رونق تاپكن و ايچكي و تشقي سياح لر بو ولايت تمان يول آليب بدخشان نينگ سياحت چليك جاذبه لريني يقين دن تماشا قيله ديلر.

بدخشان ولايتي خبر و مدنيت اداره سي ريسي نقيب الله ثاقب يار ني ايتيشيچه اوتكن ييل گه قرگنده سياحت چي لر ميزاني بو ييل ٥٠ فايز كوپيگن و بيز سياحتچي لر اوچون مناسب زمينه و امكانيت لرني مهيا ايتيش بيلن بو صناعت ني بدخشان ده رواجلنتيريش ده اميد ميز بار.

بدخشان خبر و مدنيت اداره سي ريسي گه كوره بو ولايت گه اوتكن ييلي سفر قيلگن سياح لر رقمي،٢٩٧ كيشي ايدي اما بو رقم جاري ييل ده ٤١٣ كيشي گه كوپيگن.
اوتكن ييل ده ناتينچليك لر كوپيگني دن علاوه،معياري هوتل، مهمانخانه لر، راهنما و ترجمان لر بولمگني خارجي سياح لر كميشي گه دخلدار ايدي اما جاري ييل بو امكانيت لر بدخشان نينگ حتي اوزاق توشكن منطقه لريده هم مهيا بولگن ديدي بدخشان نينگ بو مسولي.

بدخشان يشوچيلريني ايتيشيچه سياحت چليك صناعتي دنياده اينگ درآمدلي صناعت لردن بيري دير و حكومت بدخشان ده بو صناعت ني رواج رونقي اوچون ايجابي ريجه لرني عملي قيليشي كيرك.
بدخشان مدني فعال لريدن بولگن عبدالبصير حقجو هر چند بدخشان ده امنيت تامين لنيشي اوچون ايريم سعي و حركتلر دولت تمانيدن عمل گه آشيريلگن اما هنوز هم سياحت چليك اوچون مناسب بولگن يوللرده ناتينجليك سبب خارجي سياح لر جدي تهديدلرگه يوزمه يوز بوليش لري ممكن ديدي.

ليكن بدخشان مدنيت و خبر اداره ريسي بو ولايت نينگ اوچ اولسوال ليكي طالبان دن تازه لنگني و بدخشان جغرافياسيدن كتته قسمي ده امنيت تامين بوليشي بيلن خارجي سياح لر ميزاني اوتكن ييل گه قرگنده كوزگه كورنرليچه آشكن ديدي.
ثاقب يار جناب لري، بدخشان محلي رسمي لري كيله سي ييل ده خارجي سياح لردن حمايه ايتوچي اويشمه، راهنما و ترجمان لرگه كيرك تعليمات بيريش و شونينگ ديك بير امنيتي ميكانيزم ني ايجاد ايتيش كبي برنامه لرني سياحت چليك صناعتي ني رونقي اوچون قول اوستيگه الگن ميز ديب ايتي.

اونگه كوره توريسيم صناعتي، كوپ درآمدلي صناعت اوله راق بدخشان نينگ محلي حكومتي دقت مركزي جايلشكن و اولر همه دن كوره امنيتي قوتلر همكارليگي بيلن خوفسيزليك ني تامين لشده سعي قيليب اعتبار قرتكن لر.
هرچند بدخشان محلي مسول لري آخركي آي لرده خارجي سياح لر ميزاني كوپيگني دن سوز يورته ديلر اما اقتصاد متخصص لري اكثر خارجي سياح لر تاجكيستان آرقلي بدخشان گه كيليش لريني ايتيب بو جهت بدخشان اهالي سي قولگه كيريته ياتگان درآمد تاجكيستان ليك لر چونته سيگه كيره دي ديديلر.

بو متخصص لر اگر خارجي سياح لر افغانستان يوللريدن بدخشان گه سفر قيلسه لر، هوتل لرده استقامت قيليش، باردي كيلدي، راهنما و ترجمان لرني ايش گه آليش، آذوق اوقات و سودا ساتيق لري اوچون صرف له ياتكان مبلغ برچه سي افغانستان اهالي سي جونته سيگه كيره دي ديب فكر بيلديره ديلر.
اقتصاد متخصصي عبدالقديرگه كوره خارجي سياح لرني اقامت كون لريدن كوپ راقي تاجيكستان گه اوته دي و اولر آز مدت بدخشان ده استقامت قيله ديلر شوني اوچون اولرني بدخشان گه كيليشي محل يشوچي لريگه اونچه ليك فايده يتكزمي دي.

اما بدخشان مدنيت و خبر اداره سي ريسي جاري ييل ده٤١٣ خارجي سياح بدخشان گه سفر قيليب اگر هر سياح ني صرف لگن مبلغي ني ٢ مينگ دالر اورته چه حساب لسك ، بو سياح لر توپلم ٨٠٠ مينگ دالر مبلغ صرفلشكن لر كه بو مبلغ بدخشان اهالي سي جونته سيگه كيرگن ديدي.
اونگه كوره خارجي سياحلر عموما محلي محصولات و عياللر قول صنعتي ني ساتيب اليب اوزلري بيلن ساوغه صفتي ده آليب كيتكن لر .

اقتصاد ايشبلرمان لري ايسه سياحت چليك ني رواج رونقي اوچون امنيت تامين لنيشي و كيركلي امكانيتلر و زمينه لر مساعد ايتيليشي دن اوتر ، اگر عياللر قول صنعتي، محلي بازارلر رواجلنتيريشي و چيگره وي بازار ايجاد ايتيليشي ده هم ييترليچه اعتبار قرتيلسه سياحتچليك رواج رونقي اوچون مثبي تاثير قالديريش دن علاوه اهالي اقتصاديگه هم يخشي تاثير يتكزه دي ديديلر.

بونگه قوشيمچه بدخشان ولايت حاكمي سوزلوچي سي نيك محمد نظري محلي حكومت،اغاخان بنيادي همكارليگي بيلن بير قطار مهمانخانه و هوتل لر قوريشي و راهنما و ترجمان قولي ليك لرني ايجاد ايتيش بيلن بو ولايت ده سياحت چيليك ني رواجلنتيريش مقصديده ايجابي ايشلرني عمل گه آشيريشي دن علاوه باشقه بير فطار ريجه لرني هم قول اوستيگه آلكن ديب ايتي.

نظري گه كوره بدخشان محلي اداره سي امنيت ني تامينلش،مهمانخانه و هوتل لرني قوريش دن علاوه، بيرقطار ياردمچي موسسه لر همكارليگي بيلن موترلر باره آلمه ياتكان يوللرده محلي ترانسپورت خذمت لريني هم مساعد ايتكن ديدي.

بدخشان محلي رسمي لري سياحت چيليك صناعتي درآمدلي صناعت ايكني گه قرگنده محل يشوچي لري اقتصادي يوكسليشي گه مثبي تاثير يتكزيشي گه قرگنده دولت امنيت ني تامين لش، معياري هوتل لر و دم آليش محل لرايجاد ايتيشي،تاجيكستان جمهوريتي ارا يول قوريش، قوشمه چيگروي بازار ايجاد ايتيش كبي برنامه لرني هم سياحت چيليك رواج رونقي اوچون قول اوستيگه آلگن ديدي.

بدخشان محلي رسمي جاري ييل ده خارجي سياح لر ميزاني كوپيگني دن علاوه ايچكي سياح لر ساني هم كوپيب قريب ١٨ مينگ كيشي بدخشان نينگ تورلي سياحتچيليك جاي لرني يقين دن تماشا قيلگني دن خبر بيرگن.