په ارزګان کې ناپېژاندو کسانو یو تاريخپوه او ليکوال عبدالله عاطفي وژلی.

په ارزګان کې ځايي سرچينو نن پنجشنبه (د زمري۱۴مه) نشانه خبري اژانس ته ویلي، عاطفي تېره شپه د ارزګان ولايت په چوره ولسوالۍ کې نامعلومو کسانو له خپل کوره  ویستلی او وژلی یې دی.

سرچینې وایي هغه سخت شکنجه شوی دی.

 عبدالله عاطفي د ارزګان ولایت د چورې ولسوالي اوسېدونکی و.

عاطفي په اقتصاد او انجنیرۍ کې دوې ماسټرۍ په اوکراین هېواد کې کړې وې.

عاطفي د “شرق السلطان لرغوني پښتانه عبریان” پر نوم د تاریخ یو کتاب په ۱۳۰۰ مخونو کې له نن شل کاله وړاندې چاپ کړی و او ګڼ ناچاپ کتابونه يې پاتې دي.

ياده دې وي د ارزګان د چورې ولسوالۍ لا هم د وسلوالو طالبانو تر ولکې لاندې ده؛ خو وسلوالو طالبانو د عاطفي د وژلو په اړه څه نه دي ويلي.