بدخشان ولایتی عیاللرایشلری بویچه اداره سی سکیزینچی مارچ عیاللرخلق ارا کونی مناسبتی بیلن قان بیریش کمپاینی نی یولگه قویدی. اونلبچه بدخشان لیک عیال بو دستورنی آلقیشلب بدخشان مرکزی کسلخانه سیگه باریب قان بیردیلر.

بوکمپاین تشبثکارلریگه کوره اولر اقتصادی معما و قیینتچلیک لرگه دچار بولگن بیمارلر و قان ساتیب آلیشگه قربلری یتمگن عایله  لرگه یاردم کورستیش اوچون بو تشبث نی یولگه قویلگن لر.بو عیاللرعینی دمده بو حرکت لری بیلن بیرتماندن حاجتمند عایله لر قیینتچلیک لرینی برطرف ایتیش و باشقه تماندن قان بیریش مدنیتی نی اولکه ده رواجلنتیریش نی اوزلریگه مقصد قیلگن.

بدخشان ولایتی عیاللرایشلری ادراه سی ریسی آلینا غیاثی؛ بدخشان عیاللری، ولادت قیله یاتکان آنه لر و شونینگ دیک جراحت کورگن امنیتی قوتلری میزنی قان گه بولگن ضرورت لرینی تامین لش اوچون بو دستورنی یولگه قویگن لردیب ایتی.

غیاثی خانم دیدی:” بیز سکیزینچی مارچ عیاللر بیردملیگی خلق ارا کونی عرفه سیده میز و حاجتمندعیاللرگه یاردم کورستیش و خصوصا اوزاق قشلاق لردن شهرگه کیلگن و قان ساتیب آلیش گه قرب لری یتمگن بیمارلرگه قان بیریش دن فخر لنه میز”.

اونگه کوره قان گه ضرورتلری بولگن کوپلب عایله لرنی سرگردانلیگی سبب بدخشانلیک عیاللر بو کمپاین نی یولگه قویش دن علاوه هرییلی نیچه بار بو کمپاین گه قتنشیش اوچون جدی قرار آلینگن.

فیض اباد مرکزی کسلخانه سیده قان بیریش اوچون مراجعت ایتکن اصفه کریمی، انسان دوستلیک تویغوسی و حاجتمند بیمارلر آغیر احوالی نی یقیندن کوزتگنی سبب بو کمپاین گه قوشلیب قان بیریش ده حرکت قیلدیم دیب ایتی.

اونی ایتیشچه قان بیریش بیرتماندن انسان ساغلیکی گه فایده لی و باشقه تماندن بیمار انسان لرحیاتی نی قوتقریش ده سبب بوله دی و بدخشان لیک عیاللرشو مدنیت نی رواجلنتیریش اوچون بو کمپاین نی هر ییلی نیچه مراتبه یولگه قویه دیلر.

عینی حالده بدخشان مرکزی کسلخانه سی باش طبیبی شفیق همدرد بدخشان لیک عیاللرتمانیدن یولگه قویلگن بو کمپاین نی آلقیشلب توپلنگن قان لر بوکسلخانه احتیاجلیک لریدن بیرکتته قسمی نی برطرف ایتیش دن علاوه  قان گه ضرورتی بولگن بیمارلرگه تکین گه بیریله دی دیب ایتی.

او،  فیض آباد مرکزی کسلخانه سی قان بانکی، اهالی نینگ قان گه بولگن ضرورتلرینی برطرف ایتیش ده کیرکلی ظرفیتی یوق لیگی نی ایتیب و مسوللر قان بیریش گه تیارگرلیک کورستکن شخص لر اسمی نی رویخطده آلیب ضرورت بولگن وقت ده اولردن قان آلیش دستورینی قول اوستیگه آلگن دیدی.

نیچه کون آلدین هم بدخشان ولایتی قاره لوچی اداره سی ملازم لری ۲۰ مینگ سی سی قان نی امنیتی قوتلر گه هدیه بیرگندی .