افغانستان عياللرجماعه سي سونگي ايگرمه ييل جريانيده اينگ هيجانلي و ييريك يوتوق لرگه گواه بولگن.سياست، اقتصاد،جماعه،عالي اوقويورت و نهايت ده سپورت ميدان لريده قتنشيش لري كوپيگني، بو اوزگريش لر جمله سيدن دير.

حاضر هرات ليك قيزلر درس اوقيش و اويدن تشقريده فعاليت قيليش ده رخصت تاپكن و اولر هركوني قيز وعيال قتلمي ني اورب آلگن ديوارلرني سينديرماقده لر.

نيچه وقت آلدين گه چه تلويزيون آرقلي سپورت بيله شولريني تماشا قيليش عيب و عار بولگن پيتده قيزلر، ايندي ليك ده جدي كورش دن سونگ يشيل مستطيل ميداني گه كيريب يشيل چمن و توپ بيلن يانداشماقده لر.

هرات ليك قيزلرني فوتبال گه قيزيقيش لري اونچه ليك رواجلنگن كه حاضرچه يوزلبچه قيزلر هرات ده گي معياري فوتبال جماعه لريگه يول تاپيش يوللريني قيديرماقده.

هرات ده حاضرچه قيزلرنينگ سيكيز رسمي جماعه سي بار و بو جماعه لر منتظم روشده مشق قيليب جماعه اعضالريدن هربيري هرات تيرمه جماعه سي عضويتي ني حاصل قيليش ني اوزلريگه مقصد قيلگن.

اويغانمگن استعدادلر چخنشي

١٣٩٨ نچي ييلي يكوني كونلريدن بيريده و سياست و كرونا ويروسي خبرلري باشقه هربير واقعه دن كوره اهالي حياتي ده سايه تشله گن بير حالده هرات سپورت استديومي گه بارديم.

بو محل ده هراتليك فوتباليست قيزلر ولاياتلر ارا يقين كيله جكده اوتكزيليشي ريجه لنگن بيله شولرگه تيارگرليك آلماقده لر.

بو قيزلر نيچه مدت آلدينگه چه بوتكل ايركك لر اختياريگه بولگن بو يشيل ميدان ده حاضر غرور و فخر بيلن آديم باسيب و توپ بيلن اوينه ماقده لر.

سوسن محمدي فوتباليست قيزلردن بيري دير، عايله ده اوزاق مدتلي كورشدن سونگ فوتبال ميداني گه آديم باسيش گه موفق بولگن سوسن نشانه آژانسي بيلن صحبت ده ديدي:”تلويزيون آرقلي فوتبال بيله شولري و عيال فوتبالچي لر فعاليتي خبرلريني نشر بوليشي ، عايله سي ني اونگه رخصت بيريشي گه سبب بولگن ديب ايتي”.

او، هرات ده هرچند عيال فوتبالچي لر اوچون امكانيتلر اوته آز دير ديدي اما بو سپورت گه قيزيققن قيزلر آره سيده زور استعدادلر  تاپيلگني ني اورغوليدي .اوز جماعه سيده مركزي اوينچي پستيده اوينه ياتگان سوسن ديدي،حاضر بير تجربه لي فوتباليست بولگن، بو تجربه لرني باشقه ولايات لر قيز فوتبالچي لري بيلن اوتكزگن رقابت و بيله شولردن حاصل قيلگن من ديدي.

فوتبالچي سينگلي لر

افراطگرچيليك و عنعنوي چيكلولرني باشدن كيچيرگن هرات ليك قيزلرني اجتماعي فعاليت لرده ايركين حضورلري،ايركك لر بيلن تينگ بولگن تويغوني اولرگه اويغاتكن.

بو تويغو تجربه سي شبنم سلحشورني اوز سينگلي سيني بو سپورت گه قيزيقتيريش ده اونده گن. حاضر شبنم بيلن بيرگه اوچ سينگلي سي هرات قيزلر فوتبال جماعه سيده اوينه ماقده.

شبنم ديدي، فوتبال عاشقي دير و فوتبال گه بولگن عشقي اونگه ياردم بيرگن كه مولانا ايتكني ديك محبس قفل لريني سينديرسه.

او باشقه هم جماعه لري بيلن هفته ده اوچ كون منتظم مشق گه قتنشه دي.

اوني باشقه جماعه داشي مريم مهرزاد ديدي،بيش ييل دن بيري فوتبال قيلماقده، سپورت فعاليت لريني دوام ايتيريش ده او حاضر برچه توسيق لرني يولي اوستيدن كوتارگن و افغانستان عيال فوتبالچي لري كيله جكي يارقين ايكني گه ايشانچيم كامل ديدي.

هرات عياللر فوتبالچي جماعه سي رهبري ني ايتيشيچه حاضرچه هرات ده قيزلرني سكيز جماعه سي فعال دير، بونگه علاوه ايريم مكتب لرده هم قيزلرني فوتبال جماعه لري بار، بو قيزلرهم كيله جكده قيزلرنينگ معياري جماعه لريگه قوشيليش ارزو سيده ديرلر.

هرات قيزلر تيرمه جماعه سي مربي سي نجيب الله نورزي گه كوره افغانستان عياللر يوكسك فوتبال ليگي يولگه قويليشي سبب قيزلرني بو سپورت گه قيزيقتيرگن ديدي.

هرات قيز فوتبالچي لريدن نيچه كيشي حاضرچه افغانستان عياللر تيرمه جماعه سي عضويتي ني حاصل قيلگن.

مملكت عياللري نينگ سونگي فوتبال بيله شويده هرات تيرمه جماعه سي ايككينچي اورين ني ايگللش گه موفق بولگندي.