افغانستان تشقي ايشلر وزيرليگي گه كوره افغانستان نينگ ايران ده گي ايلچي سي ايران توپراغيده افغانستان وطنداشلري نقيله واسطه سي اوتگه يانگني واقعه سيني تيكشيريش اوچون بومملكت ني يزد ولايتيگه سفر قيلگن.

بو وزيرليك گه كوره ايرانليك مسوللر، بومملت پوليسي افغان وطنداشلري نقليه واسطه سيني نشان گه توتكني ني قبول ايتكن.

تشقي ايشلر وزيرليگي اوتكن كيچه ( جمعه ١٦ جوزا) نشرايتكن خبرنامه ده بو وزيرليك ايران نينگ يزد شهريده اوچ كيشي اولگني ، تورت كيشي ياره لنگني و نيچه كيشي دركسيز يوقالگني گه سبب بولگن افغان وطنداشلري نقليه واسط لري اوت آلگني واقعه سيني تيكشيريشي دن خبر بيرگندي.

تشقي ايشلر وزيرليگي خبرنامه سيده يازيليشيچه:” يزد ولايت حاكمي سياسي اورين باسري احمد ترحمي بهابادي ايران پولسي افغانستان وطنداشلري نقليه واسطه سيني اوق بيلن نشان گه توتيلگني تصديقلب بو نقليه واسطه سرعتي كوپ بولگني و يول چكه سيده گي ريل بيلن قتيغ قرشيلشگني سبب اوت آلگن ديب ايتكن.”

تشقي ايشلر وزيرليگي عيني دمده، افغانستان ني ايران ده گي ايلچي سي يزد ولايتي گه سفرقيلگني و بوسفرده ايران پوليسي بو نقليه واسطه ني نشان گه توتگني دليل و سببي ني انيقلش و اوني نتيجه سيني بو وزيرليك گه يوباريشي ني تاكيدلشكن.

اوتكن چهارشنبه كوني (١٤ جوزا) افغانستان ليك ايشچيلرني انتقال بيره ياتكان بير موتر اوتگه يانگني خبرقيليندي. دستلبكي راپورلرگه كوره بو حادثه ده اوچ كيشي قربان، تورت كيشي ياره لنيب و نيچه كيشي هم دركسيز يوقالگني ايتيلگندي.معلوماتلرگه كوره بو نقيله واسطه ني ١٤ يولوچي سي بارايكن و ايران پوليسي تماندن اوق گه توتيلگندن سونگ اوت آلگن.