خليل زاد و برادر دوحه كيليشونامه سي حقيده سوزلشديلر
neshananews
06 October 2020طالبان نينگ قطرده گي سياسي دفتريني اعلان ايتيشيچه امريكاني افغانستان بويچه مخصوص نماينده سي زلمي خليل زاد و طالبان نينگ سياسي دفتري رييسي ملاعبدالغني برادر، دوحه كيليشونامه سي قنداي عملي بوليشي حقيده سوزلشديلر.
طالبان نينگ قطرده گي سياسي دفتري سوزچيسي محمد نعيم وردك بوكون( سه شنبه ١٥ ميزان) توييتر صحيفه سيده يازگن بو اوچرشو اوتكن كون توشدن سونگ دوحه ده اوتكزيلگني دن خبر بيردي.وردك جنابلري بو اوچرشوده ايككي تمان دوحه كيليشوي اجرا ايتيليشي حقيده صحبت لشديلر ديب ايتي.
هرچند وردك جنابلري بو اوچرشو تفصيلاتي انيق معلومات بيرمه دي اما طالبان و دولت ارا مذاكره لرنينگ سونگي باسقيچي دوحه كيليشونامه سي گه مطابق اوتكزيليشي ني تاكيد لشدي. اما افغانستان دولتي ايككي تمان ارا مذاكره لر “تينچليك لويه جرگه” قرارلري اساسيده اوتكزيليشي ني تاكيدلشماقده. افغانستان جمهور رييسي محمد اشرف غني هم قطر حكومتي عالي رتبه لي مقاملري بيلن مذاكره قيليش اوچون قطرگه سفر قيلگن.
طالبان و امريكا ارا كيليشونامه ١٣٩٨ ييلي حوت آيي ١٠ دوحه ده امضالندي. بو كيليشونامه تورت اساسي موضوع گه مركزلشكن: طالبان نينگ خلق ارا تروريستي گروه لر بيلن علاقه لري توختتيليشي، امريكايي قوتلرني افغانستان دن بوتكل چيقيب كيتيشي، افغانستان ده زوروانليك لرني كميتيريشي و طالبان و دولت ارا يوز مه يوز مذاكره لرني باشلنيشي.
حاضرگه قدر ايككي ساحه ده يعني امريكايي حربيلرني افغانستان چيقيب كيتيشي و ايككي تمان ارا مذاكره لر باشلنيشي باره سيده ايش باشله گن، اما باشقه ايككي موضوع يعني زوروانليك لرني كمتيريليشي و طالبان نينگ خلق ارا تروريستي گروه لر بيلن علاقه لري توختتيليشي بويچه هيج قنداي ايش عملي بولمگن.
طالبان بو كيليشونامه امضالنگي دن سونگ هرچند امريكايي حربي لرگه قرشي هجوم اويشتيرمدي اما افغانستان امنيتي قوتلريگه قرشي هجوملريني كوپيتيرديلر. بو گروه شونينگ ديك القاعده و باشقه تروريستي گروه لر بيلن علاقه لريني توختتيلگني ادعا قيلگن اما امريكا تشقي ايشلر وزيرليگي ني راپورلريگه كوره طالبان هلي هم تروريستي گروه لر معنالي علاقه لريني توختتمگن.
كورينيشي دن خليل زادجنابلريني دوحه گه قيلگن سفري، امريكا جمهور رييسليك سيلاوي يقين لشگني گه قرگنده طالبان ني آتش كيسيم ني قبول قيلديريش گه سعي قيلماقده. او بوندن آلدين توييترصحيفه سيده يازگندي، امريكا، افغانستان ده زوروانليك لريني كميتيريش ده اوروش تمانلريگه باسيم لريني كوپيتيرگن.
