غني، امريكا مركزي اردوسي باش قومانداني بيلن كابل ده اوچرشدي
neshananews
13 September 2020جمهور رييس ليك سرايني اعلان قيليشيچه جمهور رييس غني امريكا قوشمه ايالت لري مركزي اردوسي باش قومانداني جنرال مك كينزي بيلن كابل ده اوچرشكن.
جمهور رييسليك سراي مطبوعات بوليمي بير خبرنامه نشرايتيب، بو اوچرشو اوتكن شام ( شنبه ٢٢ سنبله ) ارگ ده بوليب اوتكني دن خبربيرگن. خبرنامه گه كوره بو اوچرشوده جمهور رييس بيرينچي اورين باسري امرالله صالح، ملي خوفسيزليك كينگاشي مصلحت چي سي حمدالله محب و ملي مدافعه وزيرليگي سرپرستي اسدالله خالد هم اشتراك ايتكن.
خبرنامه ده ايككي تمان بو اوچرشوده افغانستان دولتي و طالبان گروهي ارا يوز مه يوز مذاكره لر باشلنگني و افغانستان امنيتي و مدافعوي قوتلردن حمايت و قوللب قوتلنيشي و افغانستان و منطقه جاري وضعيتي حقيده صحبت بولگني تاكيدلنگن.
خبرنامه جنرال مك كينزي دن نقل قيليب يازگن او جمهور رييس بيلن اوچرشكنيده طالبان و حكومت ارا بيواسطه مذاكره لر باشلنيشي عرفه سيده كابل گه سفريدن مقصد، امريكا حكومتي ني افغانستان دولتي و ملتي دن حمايت ايتيشي دوام تيتيب باريش دن ايشانچ بيلديريش ديب ايتكن.
امريكا اردو سي نينگ بو قومانداني علاوه ايتكن امريكا افغانستان بويچه برچه قرارلريني افغانستان حكومتي مصلحتي بيلن آله دي.
بو ملاقات ده جمهور رييس غني هم افغانستان، دموكراسي و بو مملكت مستق ليگي دن قطر يغينيده امريكا ني كورستكن حمايتي دن قدر دان ليك بيلديردي.
امريكا اردو سي بو قومانداني كابل گه اونداي بير حالده سفر قيلگن كه اوتكن كوني افغانستان دولتي و طالبان گروهي نماينده لري ارا قطرده يوز مه يوز مذاكره لر باشلندي. ايككي تمان بو مذاكره لرنينگ ايلك دوريده مملكت ده آتش كيسيم حقيده كيليشيش لري كوتيلماقده.
