افغانستان غربيده جايلشكن ولايتلرده عياللرگه قرشي زوروانليكلر يكونلنمي دي و هركون ايسه كوپلب عياللر تورلي زوروانليكلرني تجربه قيلماقده لر. شونينگ ديك ناتينچ بولگن فراه ولايتي ده هم عياللر وضعيتي كون اوتيشي بيلن يمانلشيب بارماقده.
فراه ولايتي عياللر اداره سي مسووللري عياللرگه قرشي زوروانليك لر كوپيشي دن تشويش اظهار ايتكن.
فراه ولايتي عياللراداره سي ريسي كبرا عظيمي گه كوره جاري ييل اولي دن حاضرگه قدر بو ولايت ده عياللرگه قرشي ١٦٨ زوروانليك واقعه سي رويخط گه آلينگن.
بو زوروانليك لردن بعضي لري حتي عياللر اوليمگه هم سبب بولگن.
خانم عظيمي بو رقم اوتكن ييلي ١٣٨ واقعه ايكني ني ايتيب قتل، شكنجه. كلتكلش، جبري اويلنتريش و قيزلرني بس ياشده تورموش گه چيقاريش فراه ولايتي ده عياللرگه قرشي زوروانليك لر جمله سيدن دير ديدي.
فراه ولايتي عياللر اداره سي ريسي، عياللرگه قرشي زوروانليك لر عاملي محل دن قاچيب و طالبان صفيگه قوشيلگنلري سبب دولتي ارگانلر اولرني توتقين ده آليب دوسيه تشكيل بيريشگه قادر ايمس ديب تاكيدلشدي.
خانم عظيمي اما ولايت يشوچيلريني عياللر حق حقوق لريدن آگاهلنتيريش اوچون سعي و حركت لرباشلنگني دن خبر بيريب اوتكن بير ييل جريانيده اينگ آز ١٢٠٠ عايله عياللر اداره سي تمانيدن يولگه قويلگن تعليمي دستورلرگه اشتراك ايتكن ديدي.
فراه مملكت نينگ ناتينچ ولايت لريدن بيري دير. بو ولايت نينگ بيرقطار تومتلري جمله دن بكواه، بالابلوك، گلستان و خاك سفيد تومنلريده طالبان حنگچي لري اوته فعال دير. طالبان نينگ بو منطقه لرده حضوري عياللرني، حمايه ايتوچي ارگان لر خذمت لريدن محروم قيلگن.